Xitay hökümiti mejburi hamile chüshürüsh weqesige chétishliq üch neper hökümet emeldarini xizmitidin toxtitip qoyghan

Shenshi ölkisidiki yerlik da'iriler féng jyenméy isimlik hamilidar ayalning 7 ayliq hamilisini chüshürüwétishke mejburlighan üch emeldarni wezipisidin toxtitip qoyghan.
Muxbirimiz erkin
2012.06.15

Xitayning shenshi ölkisi, enkang sheherlik pilanliq tughut komitéti xadimlirining féng jyenméyni mejburlap, uning 7 ayliq hamilisini alduruwétishi dunya axbarat wasitilirige ashkarilinip zor ghulghula qozghighan. Amérika dölet ishlar ministirliqi mezkur weqege inkas qayturup, xitayning bir perzentlik pilanliq tughut siyasitidin qattiq endishe qilidighanliqini bildürgen idi.

Enkang sheherlik hökümet da'irilirining bildürüshiche, bügün enkang shehirining mu'awin bashliqi féng jyenméyni yoqlap bérip, uningdin epu sorighan. Shinxu'a axbarat agéntliqi bolsa féng jyenméy turushluq bazarning hökümet bashliqi we ikki neper pilanliq tughut komitéti mes'ulining wezipisidin yiraqlashturulghanliqini xewer qildi.

Biraq xitay hökümitini tenqid qilghuchilar, féng jyenméy weqesi xitayning 30 yildin buyan yolgha qoyup kelgen pilanliq tughut siyasitining netijisi ikenliki, da'iriler jama'et pikrining bésimida féng jyenméydin epu sorighan bolsimu, biraq minglighan‏-on minglighan féng jyenméy weqelirining yoshurup kéliniwatqanliqini ilgiri sürmekte.

Xitay hökümitining ashkarilishiche, pilanliq tughut siyasiti yolgha qoyulghandin buyan 400 milyon adem az tughulghan. Biraq tenqidchiler xitayda pilanliq tughut siyasiti seweblik er-ayallar nisbiti éghir buzghunchiliqqa uchrighanliqini agahlandurmaqta.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.