Хитай сәһийә даирилири өлүм иҗра қилинған мәһбусларниң ички әзалирини көчүрүшкә чәклимә қойидиғанлиқини билдүрди

Хитай ахбарат васитилириниң хәвәр қилишичә, хитай сәһийә даирилири өлүм җазаси берилип иҗра қилинған мәһбусларниң ички әзалирини көчүрүшкә чәклимә қоюп, қаза қилған кишиләрниң ички әзалирини ианә қилиш системисиға көчидиғанлиқи, бу системиниң кәлгүси 5 йил ичидә йолға қоюлидиғанлиқини билдүргән.
Мухбиримиз әркин
2012.03.23

Хитай ички орган әткәсчилики әң ронақ тапқан дөләтләрниң биридур. Хәлқара кишилик һоқуқ вә чәтәлдики хитай өктичи гуруһлар хитай сәһийә тармақлириниң билән тәптиш оргини билән тил бириктүрүп, өлүм җазасиға буйрулған мәһбусларниң ички әзалирини еливетип, ички әзалирини йәңгүшләшкә еһтияҗлиқ пулдар бимарларға көчүрүш арқилиқ ғайәт зор пайда тепиватқанлиқи, бу җәрянда мәһбусларниң вә аилә тавабиатиниң һоқуқиға еғир бузғунчилиқ қиливатқанлиқини оттуриға қоюп кәлгән.

Хитай муавин сәһийә министири хуаң җйефу шинхуа агентлиқиға әскәртип, “җуңго... 3 Йилдин 5 йилғичә болған вақит ичидә мәһбусларниң ички әзалирини елиштин ибарәт бинормал усулни пүтүнләй бикар қилиду” дегән. Бирақ у, сәһийә тармақлириниң тәптиш оргини билән тил бириктүрүвалидиған әһвалға қандақ хатимә беридиғанлиқини тилға алмиған.

Хитай һөкүмити 2007‏-йилдин башлап ички әзалар содисини чәкләп, ианә түзүмини йолға қойған болсиму, бирақ хитай дунядики ички әзалар әткәсчилики әң ронақ тапқан дөләт болуштәк әһвалда һечқандақ өзгириш болмиған иди.

Пәрәз қилинишичә, хитайда һәр йили бир милйон 500 миң бимар ички әзасини көчүрүшкә еһтияҗлиқ болсиму, бирақ аран 10 миң буниңға мувәппәқ болалайдикән. Көзәткүчиләр, бу әһвал ички әзалар әткәсчиликиниң ронақ тепишиға түрткә болуватқанлиқини билдүрмәктә.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.