Uyghur élidin yene 369 yash xitay ölkilirige "Qayta terbiyilinish" üchün élip méngildi

Bügün shinxu'a agéntliqining xewiridin melum bolushiche, yéqinda toqsun, pichan nahiyiliridin we altay wilayitidin kelgen jem'iy 369 neper yash xunen we xi lungjyang ölkilirige qayta terbiyilinish üchün yürüp ketken.
Muxbirimiz irade
2011-03-31
Share
Toqsun we pichandin kelgen 120 neper yash xunen ölkisining shyangten, guyyang qatarliq sheherlirige ewetilgen bolup, bu yashlar özliri teqsim qilin'ghan u sheherlerde bir yérim yil boyiche qayta terbiye alidiken.

Xitay hökümiti yéqinda Uyghur élidiki ishsizliq mesilisini hel qilishning bir tedbiri süpitide Uyghur élide aliy mektepni püttürüp bolghan yashlarni qaytidin xitay ölkilirige apirip terbiyileshtek layihini yolgha qoyup, uni resmiy ijra qilishqa bashlighan we tunji türkümde ikki yérim mingdin artuq yerlik millet yashlirini yolgha salghan idi.

Xitay hökümiti bu siyasitini yashlarning ishqa orunlishishi üchün tépilghusiz purset dep teshwiq qilmaqta.

Emma, xitay hökümiti Uyghur élide atalmish halqima tereqqiyat pilanini yolgha qoyup, xitay ölkiliridin hedep "Ixtisasliq xadim" teklip qiliwatqan, xitay ölkiliride aliy mektep tügetken xitay oqughuchiliri türküm-türkümlep Uyghur rayonigha kélip ishqa orunlishiwatqan bir shara'it astida, yerlik millet oqughuchilirining xitay ölkilirige ewetilishi chet'ellerdiki Uyghur pa'aliyetchiliri we ziyaliylirining qattiq gumanini qozghimaqta.

Ular xitay hökümitining bu pilanini Uyghur yashlirini tarqaqlashturup, assimilyatsiye qilish siyasitining yene bir xil wasitisi dep qarimaqta.

Xewerdin melum bolushiche, bu yil axirighiche, xunen ölkisining peqet shyangten shehirige baridighan oqughuchilarning sanila 800 din éship kétidiken.
Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet