Ислам кәримоф билән ху җинтав ашхабадта учрашти

13 - Декабир күни хитай дөләт рәиси ху җинтав өзбекистан президенти ислам кәримоф билән ашхабадта учришип, икки мәмликәт мунасивәтлири һәққидә сөһбәт өткүзди.
Мухбиримиз үмүдвар
2009-12-13
Share

Фәрғанә агентлиқиниң хәвәр қилишичә, ислам кәримоф түркмәнистан президенти қурбангүл бәрди муһәммәдофниң рәсмий тәклипигә бинаән түркмәнистанни зиярәт қилишқа кәлгән һәмдә дүшәнбә күни оттура асия - хитай тәбиий газ турубисиниң исқа кириштүрүлүш мурасимиға қатнашмақчи иди.

Шинхуа агентлиқиниң хәвәр қилишичә, ху җинтав ислам кәримоф билән елип барған сөһбитидә җуңгониң өзбекистан билән болған мунасивитигә юқири дәриҗидә әһмийәт бериватқанлиқи һәмдә өзбекистанниң җуңгониң оттура асиядики муһим һәмкарлишидиған шерики икәнликини тәкитлигән.

Ху җинтав ислам кәримоф билән елип барған сөһбитиниң тәркибий қисими сүпитидә аталмиш "үч хил күч"кә зәрбә бериш мәсилисини тәкитлигән. Ислам кәримофму җавабән, "хитайниң өзбекистанниң әң ишәнчлик вә әң ишинишкә болидиған дости икәнлики"ни тәкитләш билән биргә ташкәнтниң хитайниң "тибәт мустәқиллиқи", "тәйвән мустәқиллиқи" һәмдә "үч хил күчкә" ортақ қарши турушини қәтий қоллайдиғанлиқини изһар қилған.

Хәвәрләрдин мәлум болушичә, өзбекистан билән хитайниң арисида зор миқдарда тәбиий газ келишими бар болуп, ху җинтавниң бу қетимқи оттура асия зияритиниң оттура асия райониниң тәбиий газлирини сетивелиш җәһәттә үстүнлүкни игиләп кәлгән русийиниң енергийә мәнпәәтлиригә сәлбий инкас пәйда қилидиғанлиқи, оттура асия рәһбәрлириниң хитай билән русийә арисида тәбиий газ оюни ойнаватқанлиқи тәһлил қилинмақта.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт