Исраилийиниң ғәззә райониға қилған һава һуҗуми сәвәблик оттура шәрқ вәзийити җиддийләшти

Исраилийиниң һава һуҗуми сәвәблик оттура шәрқтә җиддий вәзийәт шәкилләнгәнлики бирнәччә күндин буян хәлқара мәтбуатларниң муһим хәвәр темисиға айланди.
Мухбиримиз меһрибан
2012-11-20
Елхәт
Пикир
Share
Принт

Пәләстиндики хамас тәшкилати хадиминиң ахбарат орунлириға билдүрүшичә, исраилийиниң пәләстинниң ғәззә райониға қилған һавадин бомбардиман қилиш һәрикити 19-ноябир дүшәнбә күни 6-күнигә қәдәм қойған. Бир һәптә ичидә ғәззә районида елип берилған һава һуҗумида өлгәнләр сани 105 кишигә йәткән. Башқа хәвәрләрдин мәлум болушичә, хамас тәшкилатиму 19-ноябир дүшәнбә күни исраилийигә қаритип, 100 нәччә пай ракета атқан болуп, әмма исраилийә тәрәптә ярилиниш әһвали һәққидә сәйшәнбә күнигә қәдәр хәвәр берилмиди.

Өткән һәптиниң ахиридин башлап, америка, түркийә, русийә, мисир қатарлиқ дөләтләр рәһбәрлири һәм бирләшкән дөләтләр тәшкилати оттура шәрқтики җиддий вәзийәтни пәсәйтишкә чақириқ қилмақта. Б б с агентлиқиниң 20-ноябир сәйшәнбә күнидики хәвиридә америка президенти обаманиң дүшәнбә күни исраилийә баш министири нетин яхо вә мисир президенти морсиға айрим-айрим телефон қилип, җиддийлишиватқан ғәззә райони вәзийитини пәсәйтишни тәләп қилғанлиқи хәвәр қилинди.

Бирләшкән дөләтләр тәшкилати баш катипи бан ки монму дүшәнбә күни қаһирәгә йетип кәлгән болуп, бан ки мон исраилийә баш министири нетин яху вә пәләстин рәһбири аббас билән көрүшкән. Түркийә мәтбуатлирида түркийә баш министири рәҗәп таййип әрдуғанниң исраилийиниң ғәззә районида елип барған һава һуҗумида пуқраларниң өлгәнликини оттуриға қоюп, исраилийини террорлуқ билән әйиблигәнлики вә хамас тәрәпниң уруш тохтитиш қарари алғанлиқи хәвәр қилинди.

Пикирләр (0)
Share
Толуқ бәт