Исраилийә хамастин әсиргә чүшкән исраилийә әскирини қоюп беришни шәрт қилди

Хәлқара җәмийәтниң ариға чүшүши нәтиҗисидә исраилийә ғәззә райониға қаратқан үч һәптилик һуҗумини тохтатқан болсиму, лекин исраилийә билән хамас арисида узун муддәтлик тинчлиқ келишими түзүш үчүн сөһбәт елип бериш техи әмәлгә ашмайватиду.
Мухбиримиз үмидвар
2009.02.15

Бирләшмә агентлиқиниң хәвәр қилишичә, шәнбә күни исраилийә ички ишлар министири хамастин әсиргә чүшүп қалған исраилийә әскирини қоюп беришни тәләп қилип, хамасниң мәзкур әсирни қоюп бәргәндила икки тәрәп арисида тинчлиқ сөһбитини елип бериш мумкинликини билдүргән.

Әмма, хамас исраилийә тәрәпниң бу тәлипини рәт қилған вә исраилийә билән хамас арисида узун муддәтлик тинчлиқ келишими түзүш үчүн дәсләпки шәрт ғәззәгә қатнайдиған чегра өткилини ечиветиш керәкликини оттуриға қойған. Исраилийә тәрәп вәкили болса, бу мәсилидики сөһбәтниң әмәлгә ешиши үчүн хамасниң исраилийә әсирини қоюветиши лазимлиқини тәкитлигән.

Көзәткүчиләр исраилийә тәрәп сөһбәт үчүн әсир алмаштурушни шәрт қилишиниң буниңдин кейинки вәзийәтни җиддийләштүрүп қоюши мумкинликини пәрәз қилишмақта. Чүнки, хамас бу шәрткә изчил қарши чиқиши мумкин. Исраилийиниң үч һәптилик күчлүк һуҗумлири нәтиҗисидә 1300 дин артуқ пәләстинлик һаятидин айрилған, 2000 әтрапида адәм яриланған болуп, бу әһваллар пәләстинликләрниң қаттиқ наразилиқини қозғиған иди.
Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.