Kanada besh yil ichide ming neper tibet musapirini qobul qilmaqchi

Xitay tilida chiqidighan " ulugh éra" gézitining kanadadiki tibet komitétining uchuridin neqil élip tarqatqan uchurida yézilishiche, kanada hökümiti bu qararni 18-dékabir küni élan qilghan bolup, kanadaning köchmenler we puqralar ishlirigha mes'ul ministiri " kanadaning hindistan hökümiti we kanada tibet komitétining özliri bilen hemkarliship, bu ishni ongushluq béjirishni kütüwatqanliqini, jümlidin tibet musapirlirining kanadagha kélishini qarshi alidighanliqi"ni bildürgen.

Xewerde éytilishiche, 2007-yili tibet rohaniy dahiysi dalay lama kanadani ziyaret qilghanda, kanada hökümitidin tibet musapirlirini qobul qilishni telep qilghan iken.
1959-Yilidiki tibet qozghilingining basturulushi bilen dalay lama wetinidin ayrilghandin kéyin bir qisim eller tibet musapirlirini resmiy siyasiy basturushqa uchrighan musapir süpitide qarap qobul qilghan idi. Tibet musapirlirining amérika, kanada we bashqa yawropa elliride köpiyishi tibet dawasining xelq'ara sehnide küchiyishidiki muhim amillarning birige aylan'ghan. Chünki, bu musapirlar arisidin yuqiri melumatliq, gherb tillirini yaxshi bilgen alimlar, mutexessisler, siyasetshunaslar yétiship chiqip, öz dawasini ünümlük chüshendüreligen.