Kanada köchmenler ministiri xitaydin qanunsiz köchmenlerge qarshi hemkarlishishni telep qildi

Jéysin kéniy kanada hökümitining qanunsiz köchmenlerge qarshi turush iradisining qet'iy ikenlikini eskertip, xitay hökümitidin xitay puqralirining yalghan toy qilip, kanadagha köchüsh qilmishini tosushni ümid qilidighanliqini tekitligen. Uning eskertishiche, yalghan toy qilip kanadada olturaqlishish hoquqini qolgha keltürüsh, xitayda nahayiti chong sodigha aylan'ghan. Bezi kishiler pulni dep qanunsiz köchmenlerning kanadada menggülük olturaqname élishigha yardem qilmaqtiken.

Közetküchilerning eskertishiche, yéqinqi bir qanche yildin buyan xitay puqralirining yalghandin toy qilip, kanadagha köchüsh herikiti yuqiri chekke yetken.

Kanada xitay puqralirining sayahet qilishni arzu qilidighan muhim sayahet menzilgahlirining biridur. Jéysin kéniyining eskertishiche, u, xitay bilen kanada arisida imzalan'ghan kanadani xitay puqralirining sayahet menzilgahi qilip békitish kélishimidin kéyin, kanadani sayahet qilidighan xitay puqralirining köpiyidighanliqigha ishinidiken.

Kanadada oquydighan chet'ellik oqughuchilar arisida xitay oqughuchilirining sani ötken yili 50 minggha yetken. Analizchilarning eskertishiche, xitay sayahetchiliri we kanadada oquydighan xitay oqughuchilirining köpiyishige egiship, yalghandin toy qilip kanadagha olturaqlishidighan qanunsiz toy sodisimu janlan'ghan.

Analizchilar xitay hökümiti bu türlük qanunsiz qilmishlarni tosushqa hemkarlashmisa, kanadaning buninggha özi yalghuz taqabil turushi qiyin'gha toxtaydighanliqini ilgiri sürmekte.