Җаң чүншәнниң кәчлик базар зияритидики сахтилиқ ашкариланди

Хитайниң тәңритағ ториниң 5-июл күнидики хәвиридә дүшәнбә күни кәчтә уйғур аптоном райониниң партком секретари җаң чүншәнниң үрүмчи даван кечилик базириға келип, кәчлик базарда тиҗарәт қиливатқан тиҗарәтчиләр һәм аммидин һал сориғанлиқи хәвәр қилинди.
Мухбиримиз меһрибан
2011-07-05
Share

Хәвәрдә җаң чүншәнниң кәчлик базарда көпчилик билән бирликтә пива ичип муңдашқанлиқи баян қилинип, 5-июл үрүмчи вәқәси йүз берип, икки йилдин кейин үрүмчи вәзийитидә тинч, иттипақ, тәрәққият вәзийити шәкилләнгәнлики мәдһийиләнди.

Әмма дуня уйғур қурултийи тәминлигән учурлар һәм радиомиз игилигән учурлардин җаң чүншәнниң кәчлик базардики зиярити алдинала тәйярланған сахта көрүнүш икәнлики ашкариланди. Дуня уйғур қурултийи баянатчиси дилшат ришитниң билдүрүшичә, җаң чүншәнниң кәчлик базар зияритидин илгири, сақчи даирилири даван базардики уйғур тиҗарәтчилиригә қарита қаттиқ тәкшүрүш елип берип, даван базири әтрапидики бәйгә мәйдани қатарлиқ җайлардики уйғур мәһәллилиридә назарәтни күчәйтип, кәчлик базарни қамал қилған.

Мәлум болушичә, сақчилар билән һәмкарлишишни халимиған уйғур тиҗарәтчилиридин 9 тиҗарәтчиниң шу күни кечидики тиҗарити тохтитип қоюлған. Бу җәрянда сақчилар билән тиҗарәтчиләр оттурисида сүркилиш йүз берип, бир нәпәр уйғур сақчилар тәрипидин тутуп кетилгән.

Үрүмчи шәһиридин радиомиз зияритини қобул қилған шәһәр аһалилириниң билдүрүшичә, икки күндин буян сақчи даирилири нуқтилиқ һалда бәйгә мәйдани һәм дөңкөврүк әтрапидики уйғурлар зич олтурақлашқан районларға қаратқан назарәтни күчәйткән болуп, бу районларда қораллиқ сақчилардин башқа, пуқрачә кийингән сақчилар техиму көпәйтилгән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт