كىشىلىك ھوقۇق تەشكىلاتلىرى خىتاينىڭ كىشىلىك ھوقۇق ۋەزىيىتىنى ئەيىبلىدى

مەركىزى ئامېرىكىدىكى كىشىلىك ھوقۇق ئورگىنى بولغان "ئەركىنلىك سارىيى" پەيشەنبە كۈنى يىللىق دوكلاتىنى ئېلان قىلدى. دوكلاتتا ئەسكەرتىلىشىچە، ئۆتكەن بەش يىل ئىچىدە دۇنيانىڭ كىشىلىك ھوقۇق ۋەزىيىتى ئىزچىل كەينىگە چېكىنگەن.
مۇخبىرىمىز ئىرادە
2011-01-13
Share

دوكلاتتا خىتايدىكى كىشىلىك ھوقۇق ۋەزىيىتى ئالاھىدە تىلغا ئېلىنغان بولۇپ، خىتاي ھۆكۈمىتىنىڭ باستۇرۇش تەدبىرلىرىنى ئىزچىل ھالدا كۈچلەندۈرۈۋاتقانلىقى، خىتاي ئۆكتىچى ليۇ شاۋبو نوبېل تىنچلىق مۇكاپاتىغا ئېرىشكەندىن كېيىن، خىتاينىڭ ھەرقايسى دۆلەتلەرگە مۇكاپات تارقىتىش مۇراسىمىغا قاتناشماسلىق ھەققىدە بېسىم ئىشلەتكەنلىكى قاتتىق تەنقىد قىلىندى.

مەركىزى نيۇيوركتىكى "كىشىلىك ھوقۇقنى كۆزىتىش" تەشكىلاتىمۇ سەيشەنبە كۈنى ئېلان قىلغان يىللىق دوكلاتىدا خىتاي ھۆكۈمىتىنىڭ ئىنسانلارنىڭ ئەڭ ئاساسىي كىشىلىك ھوقۇقلىرىغا دەخلى-تەرۇز قىلىۋاتقانلىقىنى، ئۆزى ئېلان قىلغان "كىشىلىك ھوقۇق ھەرىكەت پىلانى" غا خىلاپ ئىش قىلىپ، پۇقرالارنىڭ ئەركىنلىكىنى بوغۇش بىلەن بىرلىكتە ئاز سانلىق مىللەتلەرنىڭ ھەق-ھوقۇقلىرىنى قاتتىق دەپسەندە قىلىۋاتقانلىقىنى ئەسكەرتكەن.

كىشىلىك ھوقۇقنى كۆزىتىش تەشكىلاتى يەنە، خىتاينىڭ ئۇيغۇرلار ۋە تىبەتلەرگە قارىتىلغان كونترولىنى كۈچەيتكەنلىكى، ئىز-دېرەكسىز يوقاپ كېتىش، قانۇنسىز قولغا ئېلىش، جازالاش، تۈرمىگە سولاش ئەھۋاللىرىنىڭ ئىلگىرىكىدىنمۇ كۆپەيگەنلىكىنى بىلدۈرگەن.

فرانسىيە ئاگېنتلىقىنىڭ خەۋەر قىلىشىچە، خىتاي تاشقى ئىشلار مىنىستىرلىقىنىڭ بايانچىسى خوڭ لېي پەيشەنبە كۈنى كىشىلىك ھوقۇق تەشكىلاتلىرىنىڭ دوكلاتلىرىغا رەددىيە بېرىپ، خىتاينىڭ كىشىلىك ھوقۇق ۋەزىيىتىدە "كۆزنى قاماشتۇرغۇدەك" دەرىجىدە ئىلگىرىلەش بولغانلىقىنى ئىلگىرى سۈرگەن.

پىكىرلەر (0)

بارلىق پىكىر - بايانلارنى كۆرۈش.

پىكىر قوشۇڭ

رادىئونىڭ ئىشلىتىش شەرتلىرىگە ئاساسەن، پىكىرلىرىڭىز تەكشۈرگۈچىلەر تەرىپىدىن تەستىقلىنىشى ۋە مۇۋاپىق دەرىجىدە تەھرىرلىنىشى تۈپەيلى، تور بەتتە دەرھال پەيدا بولمايدۇ. سىز قالدۇرغان مەزمۇنغا ئەركىن ئاسىيا رادىئوسى جاۋابكار بولمايدۇ. باشقىلارنىڭ كۆز قارىشى ۋە ھەقىقەتكە ھۆرمەت قىلىشىڭىزنى سورايمىز.

تولۇق بەت