Кишилик һоқуқ тәшкилатлири хитайниң кишилик һоқуқ вәзийитини әйиблиди

Мәркизи америкидики кишилик һоқуқ оргини болған "әркинлик сарийи" пәйшәнбә күни йиллиқ доклатини елан қилди. Доклатта әскәртилишичә, өткән бәш йил ичидә дуняниң кишилик һоқуқ вәзийити изчил кәйнигә чекингән.
Мухбиримиз ирадә
2011-01-13
Share

Доклатта хитайдики кишилик һоқуқ вәзийити алаһидә тилға елинған болуп, хитай һөкүмитиниң бастуруш тәдбирлирини изчил һалда күчләндүрүватқанлиқи, хитай өктичи лю шавбо нобел тинчлиқ мукапатиға еришкәндин кейин, хитайниң һәрқайси дөләтләргә мукапат тарқитиш мурасимиға қатнашмаслиқ һәққидә бесим ишләткәнлики қаттиқ тәнқид қилинди.

Мәркизи нюйорктики "кишилик һоқуқни көзитиш" тәшкилатиму сәйшәнбә күни елан қилған йиллиқ доклатида хитай һөкүмитиниң инсанларниң әң асасий кишилик һоқуқлириға дәхли-тәруз қиливатқанлиқини, өзи елан қилған "кишилик һоқуқ һәрикәт пилани" ға хилап иш қилип, пуқраларниң әркинликини боғуш билән бирликтә аз санлиқ милләтләрниң һәқ-һоқуқлирини қаттиқ дәпсәндә қиливатқанлиқини әскәрткән.

Кишилик һоқуқни көзитиш тәшкилати йәнә, хитайниң уйғурлар вә тибәтләргә қаритилған контролини күчәйткәнлики, из-дерәксиз йоқап кетиш, қанунсиз қолға елиш, җазалаш, түрмигә солаш әһваллириниң илгирикидинму көпәйгәнликини билдүргән.

Франсийә агентлиқиниң хәвәр қилишичә, хитай ташқи ишлар министирлиқиниң баянчиси хоң лей пәйшәнбә күни кишилик һоқуқ тәшкилатлириниң доклатлириға рәддийә берип, хитайниң кишилик һоқуқ вәзийитидә "көзни қамаштурғудәк" дәриҗидә илгириләш болғанлиқини илгири сүргән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт