Җон хунтисман хитай кишилик һоқуқ хатирисини тәнқид қилип, җуңнәнхәйниң өзгириши керәкликини тәкитлиди

Хитайдики баш әлчилик вәзиписини тамамлап, дөлитигә қайтиш алдидики америка баш әлчиси җон хунтистан вәзиписини йеңи баш әлчи гәрей луға өткүзүп бериштин бурун америка -хитай мунасивәтлири һәққидә тохтилип, хитай кишилик һоқуқ хатирисини тәнқид қилди.
Мухбиримиз әркин
2011-04-08
Share

У шаңхәйдә 6-нөвәтлик америка-хитай мунасивәтлири барнет-оксенбург мунбириниң йиғинида сөз қилип, ақсарайниң әмәс, бәлки җуңнәнхәйниң өзгириши керәкликини билдүргән.

Хунтисмән, өзиниң баш әлчилик мәзгилидә йүз бәргән америка билән хитайниң тәйвән, шималий корийә қатарлиқ бир қатар хәлқара мәсилиләрдики ихтилапи, пикир әркинлики вә кишилик һоқуқ мәсилисидики тоқунушини алаһидә тәкитләп, хитай һөкүмити тәрипидин түрмигә соланған хитай өктичилиридин шө фең, лю шавбо, чен гуаңчиң вә әй вейвейниң исмини тилға алған.

У бу кишиләрниң адаләтсиз тутқун қилинғанлиқи вә түрмигә соланғанлиқини әскәртип, лекин хитай америкиниң буниңдин кейинки баш әлчилиридин бу хил мәсилиләргә аз көңүл бөлүшини күтмәслики керәклики, чүнки “улар хитай һөкүмитигә риқабәт елан қилған, хәлқ аммисиға хизмәт қилиш нийитидики лю шавбо, чен гуаңчиң вә әй вейвейгә охшаш иҗтимаий паалийәтчиләрни қоғдайду” дегән.

У йәнә, “диалогни үзүп ташлап, ахбаратни бастуруш америка билән хитайниң өз-ара бир-бирини чүшинишигә ярдәм қилмайдиғанлиқи” ни әскәртип,“мунасивәтни қарши елинмайдиған вәқәләрдики инкасқа қарап давамлаштуруш яки тоңлитиш мәнтиқсизлиқ.

Сөһбәт йиғинлирини бикар қилиш назакәтсизлик болғинидәк, икки тәрәпниң өз-ара бир-бириниң көз қаришиға һөрмәт көрситишини алға сүрмәйду” дәп тәкитлигән.

Хитай өктичилири бу йил 2‏-айниң оттурилиридин башлап “ясимән гүли инқилаби” чақириқини оттуриға қойғандин кейин, хунтисмән өктичиләргә һесдашлиқ қилиш билән әйиблинип, хитай һөкүмитиниң наразилиқи вә хитай ахбарат васитилириниң тәнқидигә учриған иди.

Хунтисмәнниң алдинқи күни қилған юқириқи сөзи америка юқири дәриҗилик әмәлдариниң хитайни әң кәскин сөзләр билән тәнқид қилиши болуп қалди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт