Jon xuntisman xitay kishilik hoquq xatirisini tenqid qilip, jungnenxeyning özgirishi kéreklikini tekitlidi

Xitaydiki bash elchilik wezipisini tamamlap, dölitige qaytish aldidiki amérika bash elchisi jon xuntistan wezipisini yéngi bash elchi geréy lugha ötküzüp bérishtin burun amérika -xitay munasiwetliri heqqide toxtilip, xitay kishilik hoquq xatirisini tenqid qildi.
Muxbirimiz erkin
2011-04-08
Share

U shangxeyde 6-nöwetlik amérika-xitay munasiwetliri barnét-oksénburg munbirining yighinida söz qilip, aqsarayning emes, belki jungnenxeyning özgirishi kéreklikini bildürgen.

Xuntismen, özining bash elchilik mezgilide yüz bergen amérika bilen xitayning teywen, shimaliy koriye qatarliq bir qatar xelq'ara mesililerdiki ixtilapi, pikir erkinliki we kishilik hoquq mesilisidiki toqunushini alahide tekitlep, xitay hökümiti teripidin türmige solan'ghan xitay öktichiliridin shö féng, lyu shawbo, chén gu'angching we ey wéywéyning ismini tilgha alghan.

U bu kishilerning adaletsiz tutqun qilin'ghanliqi we türmige solan'ghanliqini eskertip, lékin xitay amérikining buningdin kéyinki bash elchiliridin bu xil mesililerge az köngül bölüshini kütmesliki kérekliki, chünki “Ular xitay hökümitige riqabet élan qilghan, xelq ammisigha xizmet qilish niyitidiki lyu shawbo, chén gu'angching we ey wéywéyge oxshash ijtima'iy pa'aliyetchilerni qoghdaydu” dégen.

U yene, “Di'alogni üzüp tashlap, axbaratni basturush amérika bilen xitayning öz-ara bir-birini chüshinishige yardem qilmaydighanliqi” ni eskertip,“Munasiwetni qarshi élinmaydighan weqelerdiki inkasqa qarap dawamlashturush yaki tonglitish mentiqsizliq.

Söhbet yighinlirini bikar qilish nazaketsizlik bolghinidek, ikki terepning öz-ara bir-birining köz qarishigha hörmet körsitishini algha sürmeydu” dep tekitligen.

Xitay öktichiliri bu yil 2‏-ayning otturiliridin bashlap “Yasimen güli inqilabi” chaqiriqini otturigha qoyghandin kéyin, xuntismen öktichilerge hésdashliq qilish bilen eyiblinip, xitay hökümitining naraziliqi we xitay axbarat wasitilirining tenqidige uchrighan idi.

Xuntismenning aldinqi küni qilghan yuqiriqi sözi amérika yuqiri derijilik emeldarining xitayni eng keskin sözler bilen tenqid qilishi bolup qaldi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet