Нәзәрбәнд астидики хитай әма кишилик һоқуқ паалийәтчиси чен гуаңчиң қечип кәтти

Узундин буян аилисигә нәзәрбәнд қилинған хитай әма кишилик һоқуқ паалийәтчиси чен гуаңчиң нәзәрбәнд астидин қечип кәткән.
Мухбиримиз әркин
2012.04.27

Униң қандақ қачқанлиқи ениқ болмисиму, бирақ даириләр хе пейроң исимлик бир паалийәтчини чен гуаңниң қечишиға ярдәм қилған, дегән сәвәб билән тутқун қилған.

Америкида паалийәт қилидиған “җуңго ярдәм җәмийити” намлиқ бир христиан диний тәшкилат тор бекитидә баянат елан қилип, чен гуаңчиңниң һазир мутләқ бихәтәр йәрдә панаһлиниватқанлиқини билдүргән. Мәзкур җәмийәтниң мәсули бишоп фу, б б с ға бәргән учурида чен гуаңчиңниң бейҗиңда икәнликини илгири сүргән.

Бәзи ахбарат васитилири чен гуаңчиңниң түнүгүн америка әлчиханисиға киривалғанлиқини хәвәр қилған иди. Бирақ бу хәвәрниң растлиқи һазирға қәдәр америка әлчиханиси тәрипидин испатланмиған. Шуңа чен гуаңчиңниң қәйәрдә икәнлики һазир бир сир болуп қалған.

Чәтәлдә чиқидиған хитай өктичи тор бәтлиридин бошүн тор бекити җүмә күни чен гуаңчиңниң синалғу сөзини елан қилди. Синалғуда чен гуаңчиң “мән һазир әркин болсамму, бирақ әндишәм түгимиди” дегән. Чен гуаңчиңниң илгири сүрүшичә, у даириләрниң униң аилисидин өч елишидин әндишә қилидикән.

Дегәндәк даириләр 26‏-апрел чен гуаңчиңниң шәндуң линҗяң шәһири дуңшигу кәнтидә олтурушлуқ акиси чен гуаңфу билән униң оғли чен кегуйни кәнт кадирлирини яриландурған, дәп әйибләп тутқун қилған. Мухбирлар бүгүн хитай ташқи ишлар министирлиқи баянатчиси лю вейминдин чен гуаңчиңниң қечип кетиш вәқәсини сориған болсиму, бирақ лю веймин буниңға җаваб бәрмигән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.