Сүрийә кофи аннанниң тинчлиқ пиланини қобул қилғанлиқини җакарлиди

Бүгүн сүрийә һөкүмити алаһидә әлчи кофий аннанниң тинчлиқ пиланини қобул қилғанлиқини җакарлиди.
Мухбиримиз ирадә
2012.03.27

Мәзкур пилан президент әсәдниң аһалиләр районидин әскәрлирини чекиндүрүши, һәр күни әң аз дегәндә икки саәт хәлққә инсанпәрвәрлик ярдәмлирини йәткүзүшкә рухсәт қилиш вә қолға елинған исянчиларни қоюп беришкә охшаш 6 маддини өз ичигә алған болуп, бу пилан бундин он күн илгири әсәдкә тапшурулған иди.

Мәзкур пиланда, әсәд һөкүмитигә бәлгилик бир вақит бәлгиләнмигән яки әсәд истипаға чақирилмиған. Әмма кофи аннан әсәд һөкүмитиниң юқиридики тәләпләрни орундиши үчүн һәр тәрәплимилик иш бирликини давам қилидиғанлиқини билдүрди.

Кофи аннан пиланни қоллиши үчүн русийә вә хитайда зиярәт елип барған иди. Б б с ниң ейтишичә, һәр иккила дөләт аннанниң тинчлиқ пиланиға иҗабий позитсийә билдүргән болуп, көзәткүчиләр, буниң сүрийә һөкүмитиниң юқиридики қарарни чиқиришиға сәвәб болған болған болуши мумкинликини пәрәз қилишмақта. Чүнки медиведев учришиштин кейин қилған сөзидә кофи аннанниң тинчлиқ пиланини тамамән қоллайдиғанлиқини билдүрүп “чүнки, бу сүрийини айиғи чиқмайдиған қанлиқ уруштин сақлап қалидиған ахирқи пурсәт” дегән иди.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.