Күнәстә йүз бәргән тағ сийрилиш вәқәсигә райондики төмүр кани сәвәб болғанлиқи илгири сүрүлмәктә

31-Июл күни или области күнәс наһийисиниң аралтөпә базиридики төмүр кан районида еғир дәриҗидики тағ сийрилиш вәқәси йүз бәргән.
Мухбиримиз меһрибан
2012.07.31

Мәлум болушичә, бу қетим тағ гүмүрүлүш йүз бәргән йәрниң узунлуқи 500 метир, кәңлики 60 метир болуп, көмүлүп қалған җайниң чоңқурлуқи 5-6 метир икән. Бүгүнки әң йеңи учурлардин мәлум болушичә, көмүлүп қалған 28 кишидин 14 кишиниң җәсити тепилған. Нөвәттә колаш давамлишиватмақта икән.

Хитай даирилири бу қетимқи тағ сийрилиш вәқәсиниң йүз бериш сәвәбини демигән болсиму, әмма вәқәдә көмүлүп қалған 28 кишиниң 22 нәпириниң шу йәрдики көмүр кан ишчилири икәнликини билдүргән болуп, йәрлик уйғурлар бу қетимқи тағ сийрилиш вәқәсигә районда ечиливатқан төмүр кениниң сәвәб болғанлиқини илгири сүрмәктә.

Или районида бундин илгириму адәмләрниң тағ районини зиядә колиши сәвәблик, тағ гүмүрүлүш вәқәлири йүз бәргән. Әһвалдин хәвәрдар кишиләрниң билдүрүшичә 70-йилларда или районида елип берилған тағ ичидә ләхмә колап, дөләт мудапиәсини күчәйтиш намидики мәҗбурий әмгәктә күнәс наһийисидики қарабуғра тағ арисида йүзлигән мәһбуслар гүмүрүлүп чүшкән тағ астида қелип һаятидин айрилған икән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.