Шветсийидә бир қисим уйғур мусапирлири юртиға қайтурулуш хәвпигә дуч кәлгән

Шветсийигә қечип чиққан уйғур мусапирлири шветсийә көчмәнлири идариси даирилири тәрипидин юртиға қайтуруш хәвпигә дуч кәлгән.
Муһбиримиз әркин
2010.11.26

Өткән йили үрүмчидә йүз бәргән 5"‏-июл вәқәси"гә қатнишип, шветсийигә қечип чиққан тәхминән 8-7 нәпәр уйғур мусапири шветсийә көчмәнлири идариси даирилири тәрипидин юртиға қайтуруш хәвпигә дуч кәлгән. Хәвәрләрдин мәлум болушичә, шветсийә көчмәнлири идариси даирилири шветсийигә қечип чиққан бу уйғур мусапирлириниң 5"‏- июл вәқәси"гә қатнашқанлиқини испатлайдиған йетәрлик пакит йоқлуқини сәвәб қилип, уларниң сиясий панаһлиқ илтимасини рәт қилған. Бу һәқтики хәвәрләрдә сиясий панаһлиқ тәлипи рәт қилинип қайтурулуш хәвпигә дуч кәлгән абдул исимлик уйғур мусапирниң сөзидин нәқил кәлтүрүшичә, сиясий панаһлиқ рәт қилинғандин кейин, улар б д т ниң мусапирлар ишханисиға баш уруп, уларниң арилишишини тәләп қилған вә буниңдин бир қанчә ай бурун шветсийә алий сот мәһкимисигә әрз сунған.

Лекин, улар алий сотниң қарарини күтүватқан бу мәзгилдә мусапирлар ичидин бәзи кишиләр хитайниң шветсийә һөкүмитигә бесим ишлитип, бу уйғурларни қайтуруп беришни вә хитайдин кәлгән һәр қандақ мусапирға сиясий панаһлиқ беришни рәт қилишни тәләп қилғанлиқидин хәвәр тапқан.

Хәвәрләрдин мәлум болушичә, шветсийә һөкүмити панаһлиқ беришни рәт қилған уйғур мусапирлар ичидә 5"‏- июл вәқәси"гә қатнишип, 4 ай мүкүнүп йүргәндин кейин, чәтәлгә қечип чиққан әлиҗан илһамға охшаш кишиләр бар икән. Игилишимизчә , нөвәттә панаһлиқ тәлипи рәт қилинған уйғур мусапирлириниң адвокатлири уларниң 5"‏- июл вәқәси"гә қатнашқанлиқини испатлайдиған пакит топлимақта. Дуня уйғур қурултийи шветсийә даирилириниң уйғур мусапирлирини қайтуруветиш хәвпидин әндишә қиливатқанлиқини елан қилип, әгәр улар қайтурулса еғир сиясий зиянкәшликкә учрайдиғанлиқини агаһландурған.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.