Uyghur medeniy yadikarliqliri 12 ‏- ayning otturiliridin bashlap jenubiy koriyide körgezmige qoyulidu

Jenubiy koriye paytexti sé'ulda 12‏- ayning otturliridin bashlap échilidighan "yipek yolidiki büyük medeniyetler" körgezmiside Uyghur iligha a'it 145 dane medeniy yadikarliq körgezmige qoyulidiken
Muhbirimiz erkin
2010.11.26

Bu heqtiki xewerlerdin melum bolushiche, bu qétimqi körgezme junggo medeniy yadikarliqlar almashturush merkizi bilen jenubiy koriye döletlik merkizi muziy teripidin uyushturulghan. Körgezme 12‏-ayning 17 - küni échilidiken. "Yipek yolidiki büyük medeniyetler" namidiki mezkur körgezmige xitayning dölet muziyi, gensu we ningshya ölkilik muziylardin 200 dane medeniy yadikarliq qoyulsimu, lékin Uyghur iligha a'it mediniy yadikarlar asasi salmaqni igileydu.

Körgezmige qoyulidighan Uyghurlargha a'it medeniy yadikarliqlar turpan yarghul, astane, kroren, cherchen zaghunluq, xoten qaradöng qedimqi butxanisidin tépilghan yipek buyumlar, yazma yadikarliqlar, altun buyumlar, yaghach eswaplar we resimlerni öz ichige alidiken. Xitay axbarat wastilirining uchurliridin melum bolushiche, aptonom rayonluq medeniy yadikarliqlar idarisidiki mezkur pa'aliyettin xewerdar erbaplar körgezmige qoyulidighan buyumlarning ichide tarixi eng uzun yadikarliqlar buningdin 3500 yil burunqi dewirge a'it ikenlikini, ularning ichidiki22 dane buyum 1 ‏- derijilik qoghdilidighan medeniy yadikarliqlar türige kiridighanliqini bildürgen.

Lékin, xitay metbu'atlirining bu heqtiki xewerliride, körgezmige qoyulidighan 145 dane medeniy yadikarliqning konkrét qaysi buyumlar ikenliki we u wekillik qilidighan medeniyet tilgha élinmighan. Xitay da'iriliri ötken yili yüz bergen ürümchi 5"‏- iyul weqesi"din kéyin, Uyghur medeniy yadikarliqlirini chet'elge élip chiqip körgezme qilishni kücheytken bolsimu, lékin körgezmige tallan'ghan buyumlar körgezmini körgen Uyghurlarda türluk gumaniy qarashlarni peyda qilghan idi. Uyghur aptonom rayonluq moziyi ötken yili kaliforniye shtatidiki bowérs muziyida achqan körgezmide xitayning qedimdin tartip Uyghur ilini bashqurup kelgenlikini algha sürüdighan buyumlar qoyulghan we shundaqla Uyghurlarning qedimqi tarim medeniyiti bilen bolghan munasiwiti xunükleshtürülgen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.