Xitay amérika bilen jenubiy koriyining sériq déngizda élip baridighan birleshme herbiy manéwirigha qarshi ikenlikini bildürdi

Xitay hökümiti peyshenbe küni amérika bilen jenubiy koriyining yekshenbe küni sériq déngizda élip baridighan herbiy manéwirigha inkas qayturup, manéwir élip bérishqa qarshi ikenlikini élan qildi.

2010.11.25
Share on WhatsApp
Share on WhatsApp

Xitay tashqi ishlar ministirliqi bayanatchisi léy xung peyshenbilik axbarat élan qilish yighinida "manéwirgha munasiwetlik xewerlerdin waqip bolghanliqi we buningdin endishe qilghanliqi"ni bildürgen. Léy xungning eskertishiche, xitay koriye yérim arilining tinchliqi we muqimliqigha buzghunchiliq qilidighan her qandaq heriketke qarshi turidiken. Shimaliy koriye seyshenbe küni jenubiy koriyining yunyung arilidiki bir herbiy bazisini topqa tutup, 4 ademning ölüshini keltürüp chiqarghan idi. Lékin, xitay hökümiti tereplerni özini tutuwélishqa chaqirip, tinchliqni saqlashni telep qilghan bolsimu, shimaliy koriyining herikitini tenqid qilishtin özini qachurup keldi.

Xewerlerdin melum bolushiche, xitay tashqi ishlar ministiri yang jyéchining bu hepte axiri jenubiy koriyide élip baridighan ziyariti kéchiktürülgen. Jenubiy koriye da'iriliri ziyaret yang jyéchining "xizmet küntertipi" sewebidin kéchikkenlikini bildürgen bolsimu, emma ziyaretning kéchikishige seweb bolghan konkrét amillar tilgha élinmighan. Lékin bu xitayning "yunyung weqesi"de shimaliy koriyini tenqid qilishtin özini qachurup, amérika bilen jenubiy koriyining sériq déngizda élip baridighan birleshme herbiy manéwirigha qarshi turghan mezgilge toghra kelgenliktin, ziyaretning kéchikish sewebige munasiwetlik türlük perezlerning otturigha qoyulushigha türtke boldi. Xitay tashqi ishlar ministirlikining peyshenbe küni élan qilghan bayanatidin melum bolushiche, xitay bash ministiri wén jyabaw, junggoning "ighwagerchilik xaraktérlik her qandaq herbiy heriketke qarshi turidighanliqi"ni bildürgen. Lékin, xitay terepning bayanatining, shimaliy koriyining jenubni topqa tutush weqesige qaritilghanliqi we yaki amérika-jenubiy koriye birleshme herbiy manéwirini közde tutqanliqi melum emes.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.