Куча наһийисиниң икки нәпәр һакими әрздарларни қайтуруп әкетиш үчүн бейҗиңға кәлди

Куча наһийисиниң ағу йеза рәһбәрлири өз йезисиға тәвә әрздарларни қайтуруп әкетиш үчүн икки һәптиниң алдида бейҗиңға кәлгән иди.
Мухбиримиз шөһрәт һошур
2011-01-25
Share

Уларниң тиришчанлиқлири карға кәлмигәндин кейин, куча наһийисиниң һакими йүсүпҗан вә муавин һаким атавулламу алдинқи күни бейҗиңға йетип кәлгән. Ағу йезисида елип бериливатқан төмүр йоли қурулуши бу йезидики 56 аилини 168 мо терилғу йеридин айрип ташлиған. Бу аилиликләргә дөләттин берилгән 9милйон 200 миң йүән төләм пулиниң йеримидин көпрәкини наһийилик һөкүмәт вә йеза рәһбәрлири игиливалған.

Зиянкәшликкә учриған аилиләрниң 3 нәпәр вәкили бир айниң алдида бейҗиңға йетип келип, бу әһвалини бейҗиңдики алақидар органларға шундақла ахбарат васитилиригә мәлум қилған иди. Икки нәпәр һакимниң мәхсус әрздарларни қайтуруп әкетиш үчүн бейҗиңға келиши, мәзкур әһвалниң юқири дәриҗилик органлар тәрипидин сүрүштә қилинишқа башлиғанлиқи вә яки куча наһийилик һөкүмәтниң йеза аһалилириниң төләм пулини игиливелиштәк өз қилмишидин әндишә қиливатқанлиқи мәлум болмақта.

Даириләр бейҗиңға кәлгәндин кейин, әрздарларға идийиви хизмәт ишләп, юртиға қайтип кәтсә уларни рази қилидиғанлиқини билдүргән. Әмма әрздарлар, өзлириниң бу әрзни көпчилик үчүн қиливатқанлиқини, 56 аилиниң зийини толуқ төләнмәй туруп әрзидин ваз кәчмәйдиғанлиқини вә юртиға қайтмайдиғанлиқини билдүргән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт