Хитай лопнурға баридиған 'қумул - лопнур төмүрйол' қурулушини башлиди

Шинхуа ахбарат агентлиқиниң хәвәр қилишичә, хитай төмүрйол торини уйғур елиниң лопнур наһийә базириға туташтуридиған "қумул - лопнур төмүрйоли" намидики йеңи бир қурулуш түри чаршәнбә күни иш башлиған.
Мухбиримиз әркин
2010.03.04

Бу һәқтики хәвәрләрдә, "қумул - лопнур төмүрйоли" қумул санаәт райони билән лопнурдики туз кенини өз - ара бир биригә туташтуридиғанлиқини, төмүрйол линийисиниң омуми узунлуқи тәхминән 370 километирға йетидиғанлиқини илгири сүргән.

Бәзи анализчилар, мәзкур томүрйолниң асаслиқи лопнурдики туз байлиқини тошуш мәқситидә қуруливатқанлиқини билдүрмәктә. Мәзкур төмүрйол қурулушиға уйғур аптоном райони,хитай төмүрйол министирлики вә лопнур туз ишлар чәклик мәсулийәт ширкити бирлишип мәбләғ салидиған болуп, 3 милярд йүән мәбләғ селинидикән.

Хитай ахбарат вастилириниң ашкарилишичә, лопнурдики туз записиниң омуми миқтари 500 милйон тонна болуп, мутәхәссисләр буниң иқтисади қиммити аз дегәндә 500 милярд йүәнгә ярайдиғанлиқини илгири сүргән. Бу һәқтики хәвәрләрдә, лопнур төмүр йолиниң кәлгүсидә һазир лаһийәлиниш басқучидики чиңхәй‏-шинҗаң төмүрйолиға туташтурулидиғанлиқини билдүргән.

Лекин чәтәлдики уйғур сияси паалийәтчиләр болса, "бу қурулуш хитай көчмәнлириниң көпийишини тезлитип, йәрлик хәлқниң мәдәнийити, иҗтимаий вә иқтисади паалийәт бошлуқини илгирлигән һалда тарайтиветиду," дәп тәнқид қилмақта. Лекин хитай һөкүмити бу қурулуш йәрлик иқтисадниң тәрәққиятини илгири сүрүдиғанлиқиға ишинидикән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.