Lyu shawboning tinchliq mukapatini kimning tapshurup alidighanliqi téxi éniq emes

Nobil komitétining jüme küni eskertishiche, eger lyu shawboning mukapatini bérishke mumkin bolmisa, mukapatni waqtinche özliri saqlap qoyidiken. Xitay hökümiti bu yilliq nobil tinchliq mukapatining lyu shawbogha bérilgenlikini qattiq tenqid qilip, uning ayalini nezerbent qilghan idi.

Norwégiye nobil komitétining katipi gé'ir lundéstad jüme küni axbarat wastilirige bayanat bérip, "biz mukapatni kimning alidighanliqini bilmeymiz shundaqla bu pat yéqinda melum bolmasliqi mumkin" dégen.

Buningdin burun tarqalghan xewerlerde, lyu shawboning ayalining xitay öktichiliridin 143 kishini mukapat tarqitish murasimigha teklip qilghanliqi, tyen'enmén oqughuchilar herikitining rehbiri örkeshning lyu shawbogha wakaliten mukapat tapshuruwalidighanliqi ilgiri sürülgen. Lékin toghriliqi ispatlanmighan xewer menbelirining ashkarilishiche, örkesh dölet lyu shawbogha wakaliten mukapat tapshuruwalidighanliqini ret qilghan.

Lyu shawboning ayali lyu shyaning bu ayning bashliri axbarat wastilirige bergen uchurida lyu shawboning mukapat tapshuruwélishni özige hawale qilghanliqini ilgiri sürgen. Lékin, xitay hökümiti shuningdin kéyin lyu shyani nezerbent astigha alghan idi.

Roytérs agéntliqining eskertishiche, nobil komitétining katipi lundéstad "lyu shawboning murasimgha qatnishalmaydighanliqi nahayiti éniqtek qilidu, emma uning ayalining qandaq bolidighanliqigha bir néme démek tes" dégen. U nobil institutining lyu shya bilen burun wastiliq alaqe qilghanliqi, lékin hazir mukapatni lyu shawbogha wakaliten kimning tapshurup alidighanliqi yenila éniqsiz bolup, özlirining "mesile qana'etlinerlik hel bolghanliqini hés qilghiche saqlaydighanliqini"ni bildürgen.

• Print
• Hembehr
• Ewetish

Barliq pikir - bayanlarni körüsh.

• Bügünki anglitish
• Ilgiriki anglitishlar