Май ейида хитайниң сиясий һәрикәтлири әвҗигә чиқмақчи

Уйғур елидики хитай партком катибат башқармиси бир нәччә күн алдида, хитай парткоминиң 27 - нөвәтлик милләтләр иттипақлиқи ейиниң паалийәт орунлаштуруши һәққидики уқтурушни пүтүн уйғур елидики асасий қатламларға тарқатқан.
Мухбиримиз гүлчеһрә
2009-04-28
Share

Мәзкур уқтуруштин ашкарилинишичә, хитай һөкүмити тәрипидин милләтләр иттипақлиқ ейи қилип бекитилгән май ейида уйғур ели миқясида вәтәнни сөйүш, юртни сөйүш, милләтләр иттипақлиқини сөйүшни мәқсәт қилған сиясий тәшвиқат паалийәтлирини паал елип бериш пиланланған.

Хитай җумһурийити қурулғанлиқиниң 60 йиллиқ тойиниң муқим вә мувәппәқийәтлик өткүзүлүшигә шараит һазирлаш тәйярлиқ һәрикәтлириниң бири сүпитидә елип берилмақчи болған бу нөвәтлик май ейи сиясий һәрикитидә, хитай даирилири дөләтниң улуғлуқини унтумаслиқ, партийиниң ғәмхорлуқини унтумаслиқ, милләтләр иттипақлиқиниң муқимлиқини унтумаслиқтәк, йәнила муқимлиқни қоғдаш үчүн миллий бөлгүнчиликкә қарши туруш, аптоном район сияситидә тәврәнмәслик тәшвиқатиға даир конкрет паалийәт пиланлири түзүлгән.

Хитай даирилири хели мәзгилләрдин буян хитайниң 60 йиллиқ тойиниң тинч өтүши үчүн йәнә, пүтүн уйғур ели миқясида муқимлиқни сақлашни күчәйтиш һәрикәтлирини җиддий елип бармақта иди.

Бүгүн б б с ниң хәвиридә көрситилишичә, хитай даирилири май ейиниң 10 - күнидин тартип мәмликәт миқясида йерим йилға созулған җәмийәт аманлиқини түзәш һәрикити елип бармақчи болуп буму 60 йиллиқ тойиниң тәйярлиқ һәрикити икән.

Йәни хитай келәр айдин башлап, хитай җәмийити ичидә җинайәт гуруһлириға қаттиқ зәрбә бериш, район характерлик сиясий, кәспий җинайәтләргә зәрбә бериш қатарлиқ қаттиқ зәрбә бериш һәрикитини елип барғандин сирт,чәтәлликләргә виза бериш чәклимилирини йәниму күчәйтидикән.

Мәзкур учурлар май ейида хитайниң омумий вәзийитиниң йәниму җиддий сиясий түскә киридиғанлиқидин дерәк беридикән.


Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт