Мисирда һөкүмәт җүмә күни намайишчиларни бастурушқа һәрбийләрни чиқарди

Җүмә күни мисирда президент һүсни мубарәк һакимийәт сориған 31 йилдин буянқи әң зор көләмлик һөкүмәткә қарши намайиш йүз бәрди.
Мухбиримиз әркин
2011-01-28
Share

Бу мисирда давам қиливатқан намайишниң 4‏-күни. 28-Чесла җүмә намизидин қайтқан нәччә он миңлиған аһалә мисирниң қаһирә, искәндирийә, сюз қатарлиқ шәһәрлиридә намайиш қилип, сақчилар билән тоқунушқан. Сақчилар яш аққузуш бомбиси етип вә юқири бесимлиқ су чечип, намайишчиларни тарқитиветишкә урунди.

Намайишчилар болса сақчиларға таш етип қаршилиқ көрсәткән. Мисирниң юқириқи чоң шәһәрлиридә йүз бәргән җүмә күнидики намайиш мәйли көләм вә яки адәм сани җәһәттә болсун, президент мубарәк һакимийәт сориған 31 йилдин буян тунҗи қетим көрүнүшидур. Мубарәк шу күни мисир армийисигә буйруқ чүшүрүп, қаһирә, искәндирийә вә сюз қатарлиқ шәһәрләрдә һәрбий һаләт елан қилди.

Һәрбий қисимлар юқириқи шәһәрләрдә шу йәрниң вақти билән кәч саәт 6 дин әтигән саәт 7 гичә кочиға чиқишни мәни қилған. Б б с ниң хәвәр қилишичә, нөвәттә һәрбий һаләт рәсмий йолға қоюлған болсиму, лекин мисир телевизийә қаналлири аһалиләрниң кочида давамлиқ намайиш қиливатқанлиқини көрсәтмәктә икән.

Даириләр җүмә күни интернет вә телефон алақисигә еғир кашила пәйда қилип, намайишчиларниң өз-ара алақә қилишиға қийинчилиқ туғдурған болсиму, лекин намайишчиларниң васитилик қаналлар арқилиқ өз-ара алақә қилишиватқанлиқи билдүрүлди. Бәзи хәвәрләрдин мәлум болушичә, сабиқ б д т атом енергийә оргининиң мәсули, өктичиләр рәһбири муһәммәт әл барадай өйидә нәзәрбәнд қилинған.

Бу һәқтики хәвәрләрдә йәнә, һазирға қәдәр 1000 дәк адәмниң тутқун қилинғанлиқи илгири сүрүлмәктә. Мисир америкиниң оттура шәрқтики әң йеқин иттипақдиши болуп, америка мисир вәзийитидин "чоңқур әндишә қиливатқанлиқи " ни билдүрди. Америка дөләт ишлар министирлиқи баянатчиси кровлий "мисир һөкүмити өз хәлқини тәһдит дәп қаримаслиқи, өзиниң шерики дәп қариши керәк" дегән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт