Misirda hökümet jüme küni namayishchilarni basturushqa herbiylerni chiqardi

Jüme küni misirda prézidént hüsni mubarek hakimiyet sorighan 31 yildin buyanqi eng zor kölemlik hökümetke qarshi namayish yüz berdi.
Muxbirimiz erkin
2011-01-28
Share

Bu misirda dawam qiliwatqan namayishning 4‏-küni. 28-Chésla jüme namizidin qaytqan nechche on minglighan ahale misirning qahire, iskendiriye, syuz qatarliq sheherliride namayish qilip, saqchilar bilen toqunushqan. Saqchilar yash aqquzush bombisi étip we yuqiri bésimliq su chéchip, namayishchilarni tarqitiwétishke urundi.

Namayishchilar bolsa saqchilargha tash étip qarshiliq körsetken. Misirning yuqiriqi chong sheherliride yüz bergen jüme künidiki namayish meyli kölem we yaki adem sani jehette bolsun, prézidént mubarek hakimiyet sorighan 31 yildin buyan tunji qétim körünüshidur. Mubarek shu küni misir armiyisige buyruq chüshürüp, qahire, iskendiriye we syuz qatarliq sheherlerde herbiy halet élan qildi.

Herbiy qisimlar yuqiriqi sheherlerde shu yerning waqti bilen kech sa'et 6 din etigen sa'et 7 giche kochigha chiqishni men'i qilghan. B b s ning xewer qilishiche, nöwette herbiy halet resmiy yolgha qoyulghan bolsimu, lékin misir téléwiziye qanalliri ahalilerning kochida dawamliq namayish qiliwatqanliqini körsetmekte iken.

Da'iriler jüme küni intérnét we téléfon alaqisige éghir kashila peyda qilip, namayishchilarning öz-ara alaqe qilishigha qiyinchiliq tughdurghan bolsimu, lékin namayishchilarning wasitilik qanallar arqiliq öz-ara alaqe qilishiwatqanliqi bildürüldi. Bezi xewerlerdin melum bolushiche, sabiq b d t atom énérgiye orginining mes'uli, öktichiler rehbiri muhemmet el baraday öyide nezerbend qilin'ghan.

Bu heqtiki xewerlerde yene, hazirgha qeder 1000 dek ademning tutqun qilin'ghanliqi ilgiri sürülmekte. Misir amérikining ottura sherqtiki eng yéqin ittipaqdishi bolup, amérika misir weziyitidin "chongqur endishe qiliwatqanliqi " ni bildürdi. Amérika dölet ishlar ministirliqi bayanatchisi krowliy "misir hökümiti öz xelqini tehdit dep qarimasliqi, özining shériki dep qarishi kérek" dégen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet