Gawshyung kino féstiwali 'muhebbetning 10 sherti' ni féstiwalda qoyudighanliqini resmiy élan qildi

Teywen gawshyung kino féstiwali orunlashturghuchiliri düshenbe küni, rabiye qadir xanim heqqidiki filimning féstiwalida qoyulidighanliqini resmiy élan qildi.
Muxbirimiz jüme
2009.09.28
Share on WhatsApp
Share on WhatsApp

Gawshyung kino féstiwali Uyghur milliy herikiti rehbiri rabiye qadir xanimning hayati pa'aliyiti bash téma qilin'ghan höjjetlik filim "muhebbetning on sherti" ni féstiwalda qoyidighanliqini jakarlighandin kéyin, féstiwal xitay da'irilirining küchlük qarshiliqigha uchrighan hemde xitay xakkérliri féstiwal tor bétige wirus hujumi qozghighan idi.

Bu heqte toxtalghan féstiwal bash teshkilligüchisi lyu süyying, mezkur féstiwal musteqil kino féstiwali bolghachqa köpligen kishilerning ularni xitayning bésimigha boy bermeslikke dewet qilghanliqini bildürdi.

Xitayning bésimi sewebidin kélip chiqqan jiddiylikni peseytish üchün " muhebbetning on sherti" ötken hepte gawshyung shehiridiki bir kino kutupxanisida qoyulghan idi.

Melum bolushiche, mezkur filim ötken hepte gawshyungda töt qétim körsitilgen. Féstiwal teshkilligüchisi lyu süyying bu heqte toxtilip, " kishiler bu filimge bek qiziqti we ötken heptidiki 4 qétimliq körsitishte kishiler orunning qisliqidin narazi bolushti" dédi.

U yene, ötken hepte 800 ademning " muhebbetning on sherti" ni körüshke muweppeq bolghanliqini, emma yene nurghun ademning orun yetmey qayturuwétilgenlikini bildürdi.

"Muhebbetning on sherti" xitayning bésimigha qarimay ötken ayda awstraliye mélburn kino féstiwalida qoyulghan we tamashibinlarning alqishigha érishken idi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet