Тутқун қилинған 200 мухбирниң йерими хитайда

Мәркизи париждики“чеграсиз мухбирлар тәшкилати” бу йиллиқ доклатида һазирғичә түрмидә тутуп турулуватқан 200 мухбирниң йерими хитайда икәнликини билдүрди.
Мухбиримиз меһрибан
2012.12.21

Доклаттин мәлум болушичә, хитайда тутқун қилинған мухбирлар асасән сиясий сәвәбләр билән қолға елинған болуп, уларниң ичидә зор көпчилики хитайдики аммиви тор бекәтлиридә җәмийәтниң қараңғу тәрәплирини, һөкүмәтниң сияситини вә йәрлик әмәлдарларниң сәтчиликлирини паш қилғанлиқи үчүн қолға елинған.

Доклатта йәнә, хитайдики интернет контроллуқиниң йеқиндин буян йәнә күчәйтилгәнлики баян қилинип, бир партийилик мустәбит хитай дөлитидә пуқраларниң әркин пикир қилишиға йол қоюлмиғанлиқи тәнқидләнгән. Һалбуки, хитайниң һөкүмәт ахбарати болған хәлқ гезити қармиқидики “йәр шари вақти гезити”ниң бүгүн 21-декабир җүмә күни елан қилған “тор башқурушни күчәйтиш хәлқ райиға асасән болған ” сәрләвһилик мақалисидә хитай һөкүмитиниң интернет контроллуқи ақлинип, хитайда тор абунтлириниң бихәтәрлики үчүн җуңго һөкүмитиниң интернет контроллуқини күчәйткәнлики тәкитләнди.

Хитай түрмилиридә йетиватқан мухбирлар вә тор язғучилири ичидә 5-июл үрүмчи вәқәси мәзгилидә тутқун қилинған уйғур мухбирлири вә тор язғучилириму бар болуп, улардин сиясий мәһбус гүлмирә имин вә муһәммәт абдулла қатарлиқ иккийлән мәркизи нюйорктики дуня кишилик һоқуқни көзитиш тәшкилати тәрипидин тәсис қилинған һәллман-һаммәтт намидики 2012-йиллиқ хәлқара сөз әркинлики мукапатиға еришкән иди.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.