Amérika we yawropa birliki xitayning muxbirlargha qilghan qopalliqigha qarita naraziliq bildürdi

Amérika tashqi ishlar bayanatchisi filip krawly tünügünki bayanatida, xitayning muxbirlarning bixeterlikini qoghdimaywatqanliqidin endishe qiliwatqanliqini shundaqla muxbirlargha zorawanliq qilghuchilarning sürüshte qilinishini kütüwatqanliqini bildürdi.
Muxbirimiz shöhret hoshur
2011.03.01

Bügün yawropa birlikimu bayanat élan qilip, xitayni chet'el muxbirlirining xitayda erkin we bixeter halda muxbirliq qilish hoquqigha hörmet qilishqa we kapaletlik qilishqa chaqirdi.

Intérnéttiki uchurlargha asasen, yasimen namayishini xewer qilish üchün, yekshenbe küni béyjingning wangfujing kochisigha toplan'ghan muxbirlar béyjing saqchilirining qopalliqlirigha duch kelgen. Saqchilar muxbirlarni tarqap kétishke buyrughan, muxbirlar bolsa, namayishchilarning toplinishini kütüp tarqilishni ret qilghan.

Bu jeryanda, b b s muxbiri bilen blomberg gézitining muxbiri puqrache kiyin'gen 5-6 kishining hujumigha uchrighan we apparatliri tartiwélin'ghan. Arqidin saqchilar kélip bu ikki muxbirni saqchi ponkitigha apirip soraq qilghan. Gerche soraqtin kéyin muxbirlar qoyuwétilgen we apparatliri qayturup bérilgen bolsimu, bu weqe amérika we gherb jama'etchilikining naraziliqini qozghighan idi.

Xitayning bügünki axbarat élan qilish yighinida, bu heqtiki so'algha jawab bergen xitay bayanatchi, muxbirlarning xizmet dawamida qatnashni tosuwalmasliqini, ruxset qilin'ghan jaylarda muxbirliq qilishi kéreklikini we qisqisi xitayning qanun- tüzümlirige boysunushi kéreklikini bildürgen. U yene qopal mu'amilige uchrighan muxbirning dawa achqanliqini we uninggha munasiwetlik orunlarning qarawatqanliqini bildürgen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.