Uyghur aptonom rayonida nazaret derijilik kadirdin 30 nepiri tallap békitildi

29-Yanwar küni Uyghur aptonom rayoni partkomining "nazaret derijilik kadirlarni ashkara tallash" xizmiti axirliship, netijide 30 neper nazaret derijilik kadir tallap békitilgen.
Muxbirimiz ümidwar
2011-01-30
Share

Shinxu'a agéntliqining xewer qilishiche, mezkur 30 neper nazaret derijilik kadirning 20 nepiri az sanliq millet bolup, omumiy nisbetning 66.7 Pirsentini teshkil qilidiken.

Emma, xewerde mezkur 20 neper az sanliq millet nazir derijilik kadirning qaysi milletlerge mensup ikenliki, bularning ichide Uyghurlarning qanchilik salmaqni igileydighanliqi heqqide héch néme déyilmigen, biraq bir neper qirghiz ayalning nazaret derijilik kadirliqqa tallan'ghanliqi éytilghan.

Xewerde körsitilishiche, bu kadirlar asasiy qatlamlardin tallap chiqilghan. Biraq, ularning konkrét qandaq xizmetlerge qoyulidighanliqi hazirche éniq emes. Lékin, közetküchiler 60 yildin buyan dawamliship kéliwatqan en'ene boyiche az sanliq millet kadirliri, bolupmu Uyghur aptonom rayonining aptonomiye hoquqi yürgüzüsh salahiyiti étirap qilin'ghan Uyghur kadirlirigha her derijilik partiye organlirining bash sékrétarliq salahiyiti bérilmeydighanliqi, bularni choqum xitay kadirlirining monopol qilidighanliqini körsetmekte.

Uning üstige yene Uyghur aptonom rayonining jama'et xewpsizlik, dölet bixeterlik, sana'et, iqtisad-maliye qatarliq nazukraq organlirining rehberlik wezipisini ezeldin xitay kadirlar atqurup kelmekte.

2009-Yilidiki ürümchi weqesige xitay hökümiti teripidin körsitilgen inkaslarning biri süpitide Uyghur aptonom rayonining rehberlik qatlimida qismen tertipke sélish élip bériliwatqanliqi melum.

Buningdin ilgiri partkom sékrétari wang léchu'enning ornigha teyinlen'gen jang chünshen aptonom rayon da'iriside az sanliq millet rehbiri kadirlirining sanini ashuridighanliqini tekitlep bir qatar orunlashturush élip barghanliqi xewer qilin'ghan idi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet