Xénen jinping nahiyisidiki Uyghurlarning naraziliq namayishidin kéyin namayish bashlamchiliri qolgha élindi

Nahiyilik hökümet namayish qilghan Uyghurlargha weqening yüz bérish sewebini éniqlaydighanliqini bildürgendin kéyin, nahiyining weziyiti tinchlan'ghan bolsimu, emma tutup kétilgen Uyghurlar qoyup bérilmigen.

Radi'omiz ziyaritini qobul qilghan jinping nahiyisidiki puqralar charshenbe küni yüz bergen Uyghurlarning namayishida nechche yüzligen Uyghurning Uyghurlarning diniy étiqad we kiyinish adetlirige hörmet qilishni telep qilip, nahiyilik xelq hökümitige bösüp kirgenlikini, nahiyilik hökümet da'irilirining jinping nahiyisidin 30 kilométir yiraqliqtiki nenyang dégen jaydin qoralliq saqchilarni yötkep kélip, 1000 din artuq saqchi arqiliq tertip saqlighanliqini, namayish jeryanida toqunush yüz bérip, Uyghur namayishchilarning bashlamchiliridin nechche onlighan kishining tutup kétilgenlikini, charshenbe küni namayish yüz bergende taqiwétilgen dukan we bankilarning bügün 30-chésla jüme küni échilghanliqini bildürdi.

Tünügün xénendiki Uyghurlarning namayishi heqqidiki xewer xongkong metbu'atliri we radi'omizda bérilgendin kéyin, dunya Uyghur qurultiyi bayanatchisi dilshat rishit xelq'ara metbu'atlarda bayanat bérip, xitay hökümitining Uyghurlarning naraziliq namayishini basturghanliqini eyibligen hemde xitaydin mesilini qattiq basturush yoli bilen emes, belki mesilining yüz bérish sewebini inchike tekshürüshini, Uyghurlargha qaritilghan diniy étiqad, kiyinish we bashqa jehetlerdiki barliq cheklimilerni emeldin qaldurushini telep qilghan idi.