Хенән җинпиң наһийисидики уйғурларниң наразилиқ намайишидин кейин намайиш башламчилири қолға елинди

Радиомиз бүгүн игилигән учурлардин мәлум болушичә, 28-ноябир күни хенән җинпиң наһийисидә йүз бәргән уйғурларниң наразилиқ намайишидин кейин, бир қисим намайиш башламчилири қолға елинған.
Мухбиримиз меһрибан
2012.11.30

Наһийилик һөкүмәт намайиш қилған уйғурларға вәқәниң йүз бериш сәвәбини ениқлайдиғанлиқини билдүргәндин кейин, наһийиниң вәзийити тинчланған болсиму, әмма тутуп кетилгән уйғурлар қоюп берилмигән.

Радиомиз зияритини қобул қилған җинпиң наһийисидики пуқралар чаршәнбә күни йүз бәргән уйғурларниң намайишида нәччә йүзлигән уйғурниң уйғурларниң диний етиқад вә кийиниш адәтлиригә һөрмәт қилишни тәләп қилип, наһийилик хәлқ һөкүмитигә бөсүп киргәнликини, наһийилик һөкүмәт даирилириниң җинпиң наһийисидин 30 километир йирақлиқтики нәняң дегән җайдин қораллиқ сақчиларни йөткәп келип, 1000 дин артуқ сақчи арқилиқ тәртип сақлиғанлиқини, намайиш җәрянида тоқунуш йүз берип, уйғур намайишчиларниң башламчилиридин нәччә онлиған кишиниң тутуп кетилгәнликини, чаршәнбә күни намайиш йүз бәргәндә тақиветилгән дукан вә банкиларниң бүгүн 30-чесла җүмә күни ечилғанлиқини билдүрди.

Түнүгүн хенәндики уйғурларниң намайиши һәққидики хәвәр хоңкоң мәтбуатлири вә радиомизда берилгәндин кейин, дуня уйғур қурултийи баянатчиси дилшат ришит хәлқара мәтбуатларда баянат берип, хитай һөкүмитиниң уйғурларниң наразилиқ намайишини бастурғанлиқини әйиблигән һәмдә хитайдин мәсилини қаттиқ бастуруш йоли билән әмәс, бәлки мәсилиниң йүз бериш сәвәбини инчикә тәкшүрүшини, уйғурларға қаритилған диний етиқад, кийиниш вә башқа җәһәтләрдики барлиқ чәклимиләрни әмәлдин қалдурушини тәләп қилған иди.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.