Nobél komitéti bayanat élan qilip, lyu shawbogha nobél tinchliq mukapati bergenlikini chüshendürdi

Nobél komitéti bayanat élan qilip, néme üchün xitay yazghuchi lyu shawbogha nobél tinchliq mukapati bergenlikini chüshendürdi we kishilik hoquq qanunining dölet hakimiyitidin üstün turidighanliqini ilgiri sürdi.
Muxbirimiz jume
2010-10-23
Share

Mezkur bayanat norwigiyidiki nobél komitéti re'isi thorbjorn jagalan teripidin yézilghan bolup, 23 - öktebir "nyu - york waqit géziti"ge bésildi.

Bayannamide mundaq déyilgen: "türmige tashlan'ghan pa'aliyetchi lyu shawboni 2010 - yilliq nobél tinchliq mukapati sahibi qilip tallishimizni xitay da'irilirining eyiblishi, kishilik hoquqning heqiqeten qoghdashqa erziydighanliqini yorutup berdi."

Bayanatta, xitay hökümitining kishilik hoquq mesilige kelgende "héchkimning xitayning ichi ishlirigha arilishish hoquqi yoq" dégen gépide ching turuwalidighanliqini körsitip, "emma ular yéngilishti. Xelq'araliq kishilik hoquq qanunni we ölchemliri dölet we hakimiyettin üstün turidu. Dunya jama'etchilikining kishilik hoquqning hörmet qilinishini kapaletke ige qilish burchi bar" déyilgen.

Bayanatta, birleshken döletler teshkilati qurulghanda eza döletlerning kishilerning négizlik hoquqlirini xelq'ara kishilik hoquq xitabnamisige asasen tinch yosunda hel qilishqa wede bergenliki körsitilip, " xitabnamide, dölet we hakimiyetlerning bundin kéyin cheksiz, ashu cheksiz hoquqigha xatime bérilidighanliqi körsitilgen," déyilgen.

Bayanatta xitayning asasiy qanuni boyiche démokratik dölet bolmisimu, birleshken döletler teshkilatining ezasi bolush süpiti bilen özining asasiy qanunigha xelq'araliq kishilik hoquq xitabnamisi boyiche özgertish kirgüzgenliki körsitilgen.

Bayanatta mundaq déyilgen: "halbuki, lyu ependimning türmige tashlinishi, xitay jinayi ishlar qanunning asasiy qanuni bilen bir yönilishte emeslikining roshen ispati."

Bayanat axirida, xelq'ara kishilik hoquq xitabnamiside belgilen'gen hoquqlarni kapaletke ige qilish üchün sükütte turushqa bolmaydighanliqi körsiteligen we otken 20 yilda xitayning bezi jehetlerde köpligen yaxshi netijilerni qolgha keltürgenliki otturigha qoyulup, "biz bu xildiki ilgirileshlerning izchil dawamlishishini xalaymiz. Mana bu, lyu ependige tinchliq mukapati bérishimizdiki seweb. Eger xitay bashqa eller bilen inaqliq ichide ilgirilep, dunya jama'etchilikining qimmet qarashliri saqlashta halqiliq döletke aylinimen deydiken, u choqum özining barliq puqrasigha pikir erkinliki bérishi kérek," déyilgen.

Lyu shawbo 2009 - yili dékabirda "dölet hakimiyitini aghdurush jinayiti" bilen eyiblinip, 11 yilliq qamaq jazasigha buyrulghan idi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet