Nobél inistituti tinchliq mukapatini tarqitish murasimini lyu shawbosiz ötküzüwéridighanliqini élan qildi

Nobél komitétining mes'uli jüme küni axbarat wastilirige söhbet élan qilip, bu yilliq nobél tinchliq mukapati murasimi xitay, iran qatarliq az sandiki bir qisim döletlerning bayqut qilishi we shundaqla mukapat sahibi lyu shawboning qatnishisiz ötküzülidighanliqini, lékin mukapat buyumi we mukapat sommisining tarqitilmaydighanliqini, bu nersilerni nobél komitétining saqlap qoyidighanliqini bildürgen.
Muxbirimiz erkin
2010.11.19

Fransiye axbarat agéntliqining xewer qilishiche, nobél komitétining sékritari lundistad bu qétimqi mukapat tarqitish murasimining nahayiti heywetlik we körkem ötküzülidighanliqini eskertip, "eger lu shawboning a'ilisidin mukapatni tapshuruwalidighanlar chiqmisa, peqet murasimning mukapatni sahibigha tapshuridighan 2 - 3 minut waqti qisqiraydu" dégen.

Nobél komitéti mes'uli bu sözlerni xitay, kuba, iran, iraq, rusiye qatarliq 6 dölet dölet nobil tinchliq mukapati tarqitish murasimigha qatnashmaydighanliqini élan qilip, uzun ötmey tekitligen. Rusiye mukapat tarqitish murasimigha qatnashmaydighanliqini bildürgen bolsimu, lékin tünügün murasimgha xitayning bésimi sewebidin qatnashmasliq qararigha kelgenlikini ret qilghan idi.

Nobél komitéti bu yilliq tinchliq mukapatining türmidiki xitay öktichiliridin lyu shawbogha bérilidighanliqini élan qilghandin kéyin, xitayning oslodiki elchixanisi we xitay tashqi ishlar ministirliqi oslo hem béyjingdiki chet'el elchixanilirigha xet yézip, mukapat tarqitish murasimini bayqut qilishni telep qilghan.

Xitay hökümiti buning bilen qalmay yene, lyu shawboning ayalini nezerbend qilip, uning a'ilisidin birer kishining mukapat tarqitish murasimigha qatnishishigha imkaniyet bermigen idi. Lékin, xitayning murasimni bayqut qilish chaqiriqi, démokratiye we kishilik hoquq mesilisi mewjut kuba, iran'gha oxshash az sandiki döletlerning awaz qoshushigha érishken bolsimu, amérika, en'gliye, fransiye, en'gliyini öz ichige alghan gherbtiki mutleq köp qisim döletler xitayning telipini ret qilip, murasimgha qatnishidighanliqini élan qilghan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.