Béyjing sheherlik yuqiri sot mehkimisi nobil komitétini tenqid qildi

Béyjing sheherlik yuqiri sot mehkimisining bir bayanatchisi jüme küni nobil komitétini tenqidlep, 2010‏ - yilliq nobil tinchliq mukapatining türmidiki xitay öktichiliridin lyu shawbogha bérilgenlikini eyibligen.
Muxbirimiz erkin
2010-10-29
Share

Analizchilar béyjing sheherlik yuqiri sotning nobil komitétini tenqid qilghanliqi xitay hökümitining lyu shawboni qoyup bérish heqqidiki xelq'ara chaqiriqlargha qulaq salmaydighanliqining bishariti dep qarimaqta.

Shinxu'a agéntliqining xewer qilishiche, béyjing sheherlik yuqiri sot bayanatchisi tinchliq mukapatining lyu shawbogha bérilishi junggoning edliye hoquqigha qopalliq bilen arilashqanliqtur, dep tenqid qilip, "junggo edliye organliri junggo qanuni boyiche ish béjiridu we lyu shawbogha bérilgen jaza sotning hökümi küchke ige bolghandin tartip ijra qilinishqa bashlan'ghan" dep körsetken.

Bu yilliq nobil tinchliq mukapati lyu shawbogha bérilgendin kéyin, amérika prézidénti obama qatarliq dunya rehberliri we burun nobil mukapatigha érishkenler arqa - arqidin bayanat élan qilip, xitay hökümitidin lyu shawboni qoyup bérishni we uning ayalini nezerbenttin azad qilishni telep qilghan.

Lyu shawbo nobil tinchliq mukapatigha érishkendin kéyin, xitay hökümiti lyu shawboning ayali lyu shyani nezerbent qilipla qalmay, déng zilin, yuy jye, féng jéngxu qatarliq öktichi zatlar we bir qisim tor yazghuchilirini teqip astigha alghan idi.

Chégrisiz muxbirlar teshkilati jüme küni xitay da'irilirini tenqidlep, xitayning öktichi zatlargha ighwagerchilik qilish herikitidin "bi'aram' boluwatqanliqini bildürdi. Shu küni yene junggo kishilik hoquqni qoghdighuchilar teshkilati bayanat élan qilip, xitay hökümitidin kishilik hoquqni qoghdighuchilar, öktichiler we musteqil ziyaliylarni jazalashni toxtitishni shundaqla ularning kishilik hoquqigha hörmet qilishni telep qilghan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet