Nur bekri Uyghur aptonom rayonidiki aliy mektep oqughuchilirini milletler ittipaqi ülgiliridin öginishke chaqirdi

Xitay ma'arip xewerliri torining xewer qilishiche, nur bekri yéqinda shinjang pédagogika uniwérsitéti, shinjang uniwérsitéti qatarliq 17 aliy mekteptin kelgen 3000 din artuq oqughuchigha weziyet heqqide doklat bérish yighini uyushturup, yashlardin hazirqi tarixi pursetni qedirlep, Uyghur rayonining halqima tereqqiyati we menggülük eminliki üchün küch chiqirishni telep qilghan.

Muxbirimiz irade
2011-01-13

U sözide yashlarni milletler ittipaqliqi ülgiliridin öginip, milletler ittipaqliqini ilgiri sürüshke dewet qilghan.

Emma hazir Uyghur rayonida aliy mektepni püttürgen oqughuchilarning xizmetke orunlishish mesilisi jem'iyette éghir naraziliq peyda qiliwatqan mesililerning biri bolup, oqush püttürgen Uyghur oqughuchilarning xizmetke orunlishishta ochuq - ashkara milliy kemsitilishke uchrawatqanliqi xelq'aradiki kishilik hoquq organlirining doklatliridimu yer alghan. Shundaqla bu 5-iyul ürümchi weqesining qozghilishining muhim seweblirining biri qilip körsitilgen idi.

Xewerde éytilishiche, nur bekri sözining axirida aliy mektep oqughuchilirining ishqa orunlishish mesilisi we shundaqla aptonom rayonluq hökümet yéqinda élan qilghan Uyghur rayonidiki aliy mektep we téxnikomlarni püttürgen yashlarni ishqa orunlashturush pilani heqqide alahide chüshendürüsh bergen.

Uyghur weziyitini közetküchiler buning 5- iyul weqesidin kéyin xitay da'irilirining aliy mektep oqughuchiliri arisidiki hökümetke bolghan naraziliqtin chöchüshke bashlighanliqining ipadisi ikenlikini bildürüshmekte.

Uyghur élidiki kishilik hoquq we milliy kemsitish weziyitining téximu éghirlishiwatqanliqi xelq'ara kishilik hoquq teshkilatliriningmu diqqitini tartip kéliwatqan bolup, kishilik hoquqni közitish teshkilati we amérika erkinlik sariyining seyshenbe we charshenbe künliridiki ayrim-ayrim doklatliridimu Uyghurlarning kishilik hoquq weziyitining nacharlashqanliqi mexsus bayan qilin'ghan idi.