Nur bekri, muqimliq hemmidin üstün sho'arini tashlap, tereqqiyat hemmini hel qilidu sho'arigha ésildi

Uyghur aptonom rayonining re'isi nur bekri peyshenbe küni ürümchide memliket xaraktérlik bir qisim xitay metbu'atlirining ziyaritini qobul qilip, tereqqiyat Uyghur élide mewjut barliq mesililerni hel qilishning achquchi ikenlikini bildürgen.
Muxbirimiz erkin
2011-01-21
Share

Yéqinqi waqitlargha qeder muqimliqning Uyghur élide hemmini bésip chüshidighan tüp amil ikenlikini jar sélip kelgen nur bekrining, "shinjang mesilisini hel qilishning achquchi tereqqiyat" dégen bayanati közetküchiler üchün bir tasadipiyliqtur.

U bu sözlerni peyshenbe küni xitayning xelq géziti, shinxu'a agéntliqi, merkizi téléwiziye istansisi qatarliq 9 axbarat orginining birleshme ziyaritini qobul qilip, muqimliq bilen tereqqiyatning munasiwitini qandaq bir terep qilish mesilisige da'ir bir so'algha jawab bergende tekitligen. Nur bekri " tereqqiyat shinjangdiki barliq mesililerni hel qilishning ortaq achquchidur" dégen.

Közetküchilerning ilgiri sürüshiche, nur bekrining bu sözlerni qilghan waqti bilen xitay axbarat organlirining alayiten uni ziyaret qilghan waqti, shert -shara'it nuqtisidin nahayiti nazuk bir kün'ge toghra kelgen. Bu waqit xitay dölet re'isi xu jintaw amérikini ziyaret qiliwatqan, kishilik hoquq mesilisi uning ziyaritidiki amérika jama'etchilikining eng diqqitini qozghighan mesililerdin biri bolup qalghan mezgil idi.

Nur bekri tereqqiyatni tekitligen küni xu jintaw amérika dölet mejlisini ziyaret qilip, jon bonér, élina rus létinant qatarliq awam palata rehberlirining diniy erkinlik, tibet, Uyghur we siyasiy mehbuslar mesilisidiki küchlük so'al - soriqigha duch kelgen kün bilen oxshash bir kün'ge toghra kelgen idi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet