Nurbekrining amérika ziyariti muhajirettiki Uyghurlardin mexpiy tutuldi

Xitayning shinxu'a tor békiti 17-aprél küni Uyghur aptonom rayonining re'isi nurbekrining 11-apréldin 16-aprélghiche amérikida ziyarette bolghanliqini hem missuri shtati bilen Uyghur aptonom rayoni otturisida dostluq kélishimi tüzgenlikini xewer qildi.
Muxbirimiz méhriban
2012.04.17

Emma, nurbekri bashchiliqidiki Uyghur aptonom rayoni ömikining bu qétimliq ziyariti, ziyarettin ilgiri hem ziyaret mezgilide xitaydiki herqandaq metbu'atta élan qilinmidi.

Bundin ilgirimu amérikida ziyarette bolghan Uyghur aptonom rayoni emeldarliridin jang chünshen qatarliqlarning ziyariti, ular amérikidiki ziyaritini axirlashturghandin kéyinla xitay metbu'atlirida élan qilin'ghan idi.

Muhajirettiki Uyghurlar xitay da'irilirining nurbekri hem jang chünshen'ge oxshash Uyghurlarning naraziliqi küchlük bolghan xitay emeldarlirining amérika ziyaritini mexpiy tutushining sewebi emeliyette, chet'ellerdiki xitaygha qarshi Uyghur pa'aliyetchiliri eng köp toplan'ghan amérikida qarshiliqqa uchrishidin saqlinish üchün ikenlikini ilgiri sürdi.

Dunya Uyghur qurultiyi bayanatchisi dilshat rishit öz bayanida mundaq dédi:
“Nurbekrige oxshash emeldarlar héchqachan Uyghurlarning menpe'iti üchün xizmet qilmaydu. Eksiche nurbekri nöwette Uyghur rayonida yürgüzülüwatqan qosh tilliq ma'arip namidiki Uyghur tilini assimilyatsiye qilish, Uyghur qiz-oghullirini xitay ölkilirige erzan emgek küchi qilip yötkeshtek bir qatar siyasetlerning yürgüzülüshidiki bash jawabkar. Shunga nurbekridek emeldarlar chet'ellerdiki ziyariti mezgilidila, ulargha qarshi pa'aliyet élip bériwatqan muhajirettiki Uyghurlardin éhtiyat qilip qalmastin, belki Uyghurlarning zémini ichidimu xelqning nepritige uchrimaqta. Téxi yéqindila türkiye bash ministiri rejep tayyip erdughanning ürümchi ziyariti mezgilide, nurbekrining ürümchi kochisida piyade méngishni ret qilishining özila nurbekridek emeldarlarning her waqit dekke-dükkide yashaydighanliqining ispati.”

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.