Nur bekri: 'shinjangning amanliq weziyiti bulturqidinmu jiddi'

Béyjingda xitayning ikki yighin'gha qatnishiwatqan Uyghur aptonum rayoni re'isi nur bekri jüme küni chet'el muxbirlirining ziyaritini qobul qilip " shinjangning amanliq weziyiti bulturqidinmu jiddiy, toqunushlar téximu küchiyishi mumkin" dégen.
Muxbirimiz gülchéhre
2009.03.06
Share on WhatsApp
Share on WhatsApp

En'gliye b b s radi'o téléwiziyisining jüme künidiki xewiride nur bekrining sözliridin neqil alghan bolup, nur bekri " bu yil junggo qurulghanliqining 60 yilliqi, bu chong tebriklesh peytide chégra ichi we sirtidiki düshmen küchler buzghunchiliq heriketliri élip bérishtin bash tartmaydu, hökümetke hujum qilish, her xil wasitiler bilen singip kirish, buzghunchiliq, térrorluq heriketlirini élip bérishi mumkin" dégen.

B b s ning xewiride Uyghur élidiki yerlik xelqlerning xitay da'irilirining köp sandiki xitay nopusini Uyghur élige yötkishige we bu jaydiki musulmanlargha qaratqan basturushqa narazi ikenliki we 2008 - béyjing olimpiki jeryanida Uyghur élide hökümetke qarshi bir qatar hujumlarning sadir bolghanliqi, shundaqla xitay da'irilirining Uyghur élide muqimliqni kücheytkenliki we ötken yili 11 ay jeryanida dölet bixeterlikige tehdit sélish jinayiti bilen 1259 ademni tutqun qilghanliqi qeyt qilin'ghan.

Bügün dunya Uyghur qurultiyi bayanatchisi dilshat rishit nur bekrining Uyghur élining bu yilqi muqimliq weziyiti heqqide éytqanlirigha qarita jiddiy inkas qayturup xelq'araliq metbu'at organlirigha bergen bayanatida " xitay hökümitining sherqiy türkistanda sistémiliq halda basturushni kücheytishi weziyetni téximu keskinleshtürüwatidu, 60 yildin buyan Uyghurlar xitayning tangghan atalmish aptonomiyisini héchqachan qobul qilghini yoq, nöwette xitay da'irilirining sherqiy türkistan weziyitini jiddiy dep körsitishi,téximu zor basturush élip bérishqa bahane izlewatqanliqining ipadisi" dep tekitlidi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.