Örkesh dölet gorbachéfning teklipige bina'en yaponiyide ötküzülidighan nobil mukapati sahiblirining uchrishish yighinigha qatnishidu

1989‏ - Yildiki tyen'enmén oqughuchilar herikitining rehbiri örkesh dölet, nobil mukapati sahibliri yighini re'isi, sabiq sowét ittipaqi prézidénti mixa'il gorbachéfning teklipige bina'en yaponiyining xiroshima shehiride ötküzülidighan nobil sahiblirining uchrishish yighinigha qatnishidu.
Muxbirimiz erkin
2010.10.29
Share on WhatsApp
Share on WhatsApp

Örkesh döletning jüme küni radi'omizgha bildürüshiche, u gorbachéfning resmiy teklipini tapshuruwalghan we yighin'gha qatnishishni qarar qilghan. Lékin u xiroshimadiki yighin'gha, yéqinda nobil tinchliq mukapatigha érishken türmidiki xitay öktichisi lyu shawbogha wekil bolup qatnashmaydighanliqini eskertip, yighin'gha tyen'enmén oqughuchilar herikitining rehbiri bolushtin ibaret "qimmetlik méhman" süpitide teklip qilin'ghanliqini bildürgen.

Uning eskertishiche, örkesh yighinda lyu shawbo heqqide nutuq sözlep, lyu shawboning "eqilchilik we gheyri zorawanliq" mesilisidiki kishilik qarishini tonushturudiken.

Nobil tinchliq mukapati sahiblirining xiroshimada échilidighan bu qétimqi yighini 11‏ - ayning 12 ‏- künidin 14 ‏- künigiche ötküzülidu. "Xiroshimaning mirasi‏ - yadro qorallirisiz dunya berpa qilish" namliq bu yighin 11‏ - ayning otturiliri chaqirilidighan asiya - tinch okyan iqtisadi hemkarliq teshkilati bashliqlar yighinining harpisigha orunlashturulghan.

Yighin katibat bashqarmisi élan qilghan bayanatta eskertilishiche, yighinning sahbxanliri nobil tinchliq mukapati sahibliridin 10 kishining qatnishidighanliqidin ümid barliqi, ularning ichide sabiq sowét ittipaqi prézidénti gorbachéf we tibet rohani dahisi dalay lamaning barliqini bildürgen.

Közetküchilerning eskertishiche, xitay terep bu qétimqi yighinning xitay kishilik hoquq xatirisi we uning milletler siyasitini tenqid qilidighan yighin'gha aylinip qélishidin ensireydiken.

Bu qétimqi yighin xitay - yaponiye munasiwiti sénkaku taqim arallirining igilik hoquqini talishish sewebidin nacharliship, xitayda yaponiyige qarshi namayishlar uyushturulghan shundaqla yaponiyining bir qisim yerliride xitaygha qarshi namayishlar élip bérilghan bir mezgilge toghra kelgen idi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.