Örkesh dölet xitayning Uyghur élide yürgüzgen alaqe cheklimisini tenqid qildi

Yaponiyide ziyarettiki tyen'enmén oqughuchilar herikitining rehbiri örkesh dölet tünügün yaponiye Uyghur jem'iyitining re'isi ilham toxti qatarliqlar bilen körüshüp, xitay da'irilirining "5 ‏- iyul weqesi"din buyan Uyghur élide yolgha qoyghan intérnét we téléfon alaqisini cheklesh siyasitini tenqid qildi.
Muxbirimiz erkin
2010-01-22
Share

Xitay hökümiti aldinqi küni Uyghur aptonom rayonining xelq'ara téléfon alaqe liniyisining échilghanliqini élan qilip, "5 ‏- iyul weqesi"din kéyin yolgha qoyulghan téléfon alaqe cheklimisining bikar qilin'ghanliqini jakarlighan. Örkesh dölet radi'omizning tokyodiki muxbirining ziyaritini qobul qilip, özining Uyghur éligha téléfon qilghanliqini, lékin téléfon liniyisi ulanmighanliqini bildürgen.

U, " alaqe cheklimisining bikar qilin'ghanliqini qarshi alimiz. Lékin biz junggo hökümitining 21 ‏- esirde shinjang Uyghur aptonom rayonida alaqini cheklesh siyasiti yolgha qoyghanliqini chüshenmiduq. Junggo hökümiti bimene ishlarni qilip adetlinip qalghan. Lékin bimenilikni heqiqetke aylanduruwalmasliqi kérek," dégen.

1989 ‏- Yilidiki béyjing oqughuchilar herikitining bu rehbiri 19 ‏- chisla tokyo narita xelq'ara ayrodromigha yétip kelgen bolup, uning tokyogha kélishtiki pilani xitaygha kétishni kütüp yatqan narita xelq'ara ayrodromidiki xitay dimokratik zat féng jéngxawni yoqlap, uninggha medet bérish idi.

Xitay hökümiti ikki yérim ayning aldida féng jingxawning xitaygha kirishini ret qilip, uni shangxeydin yaponiyige qayturuwetken. Féng jingxaw 77 kündin béri tokyo narita xelq'ara ayrodromida yétip - qopup, xitay da'irilirining yurtigha qaytishigha ruxset qilishini telep qilmaqta idi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet