Xitayche seher gézitide qeshqer we xotenlerde öy bahasining chüshüsh éhtimalliqi otturigha qoyuldi

Xewerde bayan qilinishiche, nöwette xitayda öy bahasi dawamliq türde örlimekte. Emma Uyghur élide öy bahasining özgirishi xitayning bashqa sheherlirige sélishturghanda perqliq amillargha baghliq؛ mesilen, jem'iyet muqimliqi we xenzu köchmenlerning turaqlishish nisbiti bu jaylardiki öy bahasini belgileydighan muhim amillardur.

Xewerde yene körsitilishiche, qeshqerning bulturqi öy bahasi bir métir kwadrati 3200 yüen bolup, bu xitaydiki sheherler boyiche öy baha tertipide 96 ‏-orunda turidu.

Xewerde eskertilishiche, Uyghur élining jenubida bulturdin bashlap ewj alghan zorawanliq tüsidiki qarshiliq heriketliri, mezkur jaylardiki öy bahasigha tesir qilishi mumkin. Eger bu xil weqeler yene dawamlashsa, xenzu ahaliliri rayondin qéchishqa bashlishi, eng bolmighanda, yéngidin köchüp kélidighan yaki meblegh salghuchilarning sani aziyishi؛ buning bilen mezkur jaylardiki öy bahasi töwenlishi mumkin.

Xitayning seher géziti otturigha qoyghan bu éhtimalliqini, bir qisim Uyghur pa'aliyetchiliri 10 yillarning aldidila otturigha qoyghan bolup, xitay we chet'el shirketlirini rayon'gha meblegh salghanda, rayondiki milletler munasiwiti weziyitini untup qalmasliqqa chaqirghan idi.

Uyghur pa'aliyetchilirining bildürüshiche, xitay köchmenlirining éqini yerlik xelqni ish imkanliridin mehrum qaldurupla qalmastin, öy we mal bahasiningmu ösüshini keltürüp chiqirip, yerlik xelqning turmushining téximu qiyinlishishighimu seweb bolghan.