Өзбекистанда парламент сайлими болуп өтти

Йәкшәнбә күни өзбекистанда парламент сайлими өткүзүлгән болуп, мәркизий асия учур ториниң өзбекистан мәнбәлиридин нәқил елип көрситишичә, пүтүн мәмликәт бойичә өткүзүлгән сайламға 53% сайлиғучи қатнишип, беләт ташлиған.
Мухбиримиз үмидвар
2009-12-27
Share

Әслидә сайламда 17 милйон адәмниң беләт ташлайдиғанлиқи тизимға елинған болсиму, бирақ, бу санниң һәммиси қатнашмиған. Өзбекистан парламентиниң төвән палатасидики 135 орун үчүн 506 намзат сайламға чүшкән болуп, мәлум болушичә буларниң көпчилики һөкүмәтни қоллайдиған партийиләрдин көрситилгән икән. Бу намзатларни асаслиқи өзбекистан демократик партийиси" миллий тиклиниш", өзбекистан сотсиял - демократлар партийиси "адаләт", өзбекистан әркин - демократик партийиси вә өзбекистан хәлқ - демократик партийиси қатарлиқлардин келип чиққан намзатлар тәшкил қилидикән.

Америка авазиниң хәвәр қилишичә, өзбекистанда техи өктичи партийиләр тизимға елинмиғанлиқи үчүн уларниң парламентта орунға игә болуши мумкин әмәс икән.

Нөвәттә, өзбекистан сөз вә мәтбуат әркинлики еғир дәриҗидә чәклиниватқан дөләт қатарида қаралмақта, өктичилик пикирдики кишиләрни қолға елиш ишлири даим болуп турмақта, сабиқ президент намзати муһәммәд салиһ қатарлиқ бир түркүм өктичиләр һазирму чәтәлләрдә өз паалийәтлирини давамлаштурмақта.

Бу қетимқи сайлам үстидин явропа бихәтәрлик вә һәмкарлиқи тәшкилати, мустәқил дөләтләр һәмдостлуқиниң иҗраийә комитети, шаңхәй һәмкарлиқ тәшкилати вә ислам конферансийиси қатарлиқ хәлқаралиқ тәшкилатлар һәмдә америка қатарлиқ 36 дөләтниң көзәткүчилири мәхсус көзитиш елип барған. Сайлам үчүн өзбекистан һөкүмити 8 йерим милйон доллар чиқим қилған икән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт