Уйғур елидә зәһәрлик сүт парашоки сәвәблик 967 балиниң бөрикидә таш пәйда болғанлиқи ениқланған

Хитайда сәнлу зәһәрлик сүт парашоки вәқәси паш болуп һазирға қәдәр болған 12 күн ичидә, пүтүн хитай миқясида кесәл болған балиларниң 53 миңдин ашқанлиқи 4 балиниң өлгәнлики мәлум. Бу балиларниң %82 и икки яштин төвән бовақлар.
Мухбиримиз гүлчеһрә
2008-09-23
Share

Уйғур ели сәһийә назаритиниң 22 - сентәбир елан қилишичә, уйғур елиниң һәр қайси вилайәт, областлирида, мәсилә көрүлгән бовақлар сүт парашокини истимал қиливатқан 18 миң 117 балиниң саламәтликини тәкшүрүш җәрянида буларниң 967 нәпиридә кесәллик аламәтлири мәлум болған , сүт парашокидин зәһәрлинип кесәллик көрүлгән балиларниң 367 си үрүмчидә, 122 си қәшқәрдә, қалғанлири һәр қайси вилайәт, шәһәрләрдә байқалған болуп һәммисиниң бөрикидә таш пәйда болғанлиқи ениқланған.

Хитайда һазирға қәдәр сәнлу маркилиқ бовақлар сүт парашокидин башқа 22 ширкәт һәм завутлар тәрипидин ишләнгән 69 хил сүт мәһсулатлирида меламиндин ибарәт зәһәрлик мадда байқилип печәтләнгән бир пәйттә, уйғур елидики арман, ихлас, мәйчүер қатарлиқ 80 дин көпрәк ширкәтниң 104хил сүт мәһсулатлириниң һәммисидә бирдәк меламин қатарлиқ зәһәрлик һәмдә саламәтликкә зиянлиқ маддилар байқалмиған болуп, хитайда елип бериливатқан кәң көләмлик сүпәт тәкшүрүш өткилидин оңушлуқ өткән.

Буниң билән уйғур елидики истималчилар, болупму уйғур ширкәтлири ишләпчиқарған сүт парашоклирини ишлитиватқан ата ‏ - анилар әндишидин қутулған. Шундақла әсли хитайда анчә нәзәргә елинмиған уйғур ели йәрлик сүт мәһсулатлириниң нөвәттә хитай ичидиму базар тепиш еһтималлиқи юқири болмақта икән.
Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт