Пакистан президенти хитайниң уйғур сияситини қоллиди

Җүмә күни хитай зияритини башлиған пакистан президенти зәрдари, хитайға қарап йолға чиқиштин бурун мухбирларға хитай - пакистан мунасивити һәққидә сөһбәт елан қилип, хитайниң уйғур илидики сияситини қоллайдиғанлиқини билдүргән.
Мухбиримиз әркин
2009.08.21

Бу зәрдариниң өткән йили вәзипигә олтурғандин бери хитайда елип барған 4 ‏- қетимлиқ зияритидур. У, шинхуа агентлиқиға бәргән баянатида 5‏ - июлдики үрүмчи намайиши, хитайниң намайишни бастурғанлиқи вә хитайлар билән уйғурлар арисида йүз бәргән тоқунуш һәққидә тохтилип, "биз үрүмчи вәзийитиниң контрол астиға елинғанлиқидин хушал, биз хитайниң инақ җәмийәт вә тәрәққият сиясити хитайдики барлиқ хәлқләргә мәнпәәт йәткүзидиғанлиқиға ишинимиз" дегән.

Көзәткүчиләр, пакистан рәһбириниң сөзи бейҗиң даирилирини хушал қилидиғанлиқини, чүнки хитай уйғур мәсилисидә ислам әллириниң сүкүт қилишини үмид қилидиғанлиқини билдүрмәктә. Дуня ислам кеңишигә әза дөләтләрдин түркийә хитайни үрүмчи вәқәсидә "ерқий тазилаш" җинайити садир қилиш билән әйиблигән шундақла бу вәқәни дуня ислам кеңишидә оттуриға қойидиғанлиқини билдүргән иди.

Зәрдари хитай зияритини башлаштин сәл бурун дуня ислам кеңишиниң бир вәкилләр өмики үрүмчини зиярәт қилип, 5 ‏- июл вәқәси үстидин тәкшүрүш елип барған.

Зәрдари бу сәпиридә бейҗиңға бармаслиқи мумкин. У хитайниң җеҗяң вә гуаңдуң өлкилиридә зиярәттә болидикән.

Мунасивәтлик хәвәрләр
Қисқа хәвәрләр
Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.