Pakistanliq uyghular pakistanning dölet bayrimini tebrikleshke qétilmidi

Pakistan hökümiti yillardin béri, pakistanliq Uyghurlarning siyasiy pa'aliyetlirige cheklime qoyup kelmekte. Shunga bu dölettiki Uyghurlar, 5 ‏- iyul ürümchi weqesidek bir chong weqede öz qérindashlirigha hésdashliq bildürüsh we xitaygha naraziliq bildürüshtek eng eqelly heqliridinmu mehrum qalghan idi.

Muxbirimiz shohret hoshur
2009-08-14

Bügün, yeni 14 - awghust pakistan musteqilliq bayrimida, bu dölettiki bir qisim Uyghurlar héchqandaq bir tebriklesh pa'aliyitige qétilmighan؛ buning ornigha ürümchi shéhitlirini xatirilep, qur'an tilawet ötküzgen.

Pakistandiki ömer Uyghur wexpining bildürüshiche, bügünki qur'an - tilawetke Uyghurlar we yerlik pakistanliqlar bolup, 100 din artuq kishi qatnashqan. Pakistan hökümiti hazirgha qeder 20 din artuq Uyghurni xitaygha qayturup bergen؛ ürümchini ziyaret qilghan 26 dölet diplomatlar ziyaret ömigidiki pakistan wekili xitayning 5 ‏ - iyul namayishini qattiq qol basturushini qollap pikir bayan qilghan.

Pakistandiki birqisim Uyghurlarning, pakistan dölet bayrimini te brikleshke qétilmasliqi, pakistan wekilining ürümchidiki sözlirige naraziliq sewebidin bolushi mumkin.

Nöwette, pakistanda yashawatqan Uyghurlar, pakistan hökümitidin narazi ikenlikini bildürüsh bilen bille, pakistan xelqidin raziliqini, bolupmu siyasiy panahlan'ghuchilarni chet - yaqidiki pakistan xelqining qanat astigha éliwatqanliqigha minnetdarliqini bildürmekte.