Палав президенти уйғурларниң хитайдин әнсирмәсликини билдүргән

Палавниң президенти җонсон торибиоң, палавға келишни халайдиған гүәнтанамодики уйғур мусапирлирини хитайдин хатирҗәм болушқа чақирип, палав уйғурларни хитайдин қоғдайдиған бихәтәр җай билән тәминлийәлмәслики мумкин, дегән қарашниң асассиз икәнликини билдүргән.
Мухбиримиз әркин
2009.06.26

Президент торибиоң бу сөзләрни палавға орунлаштурулса хитайниң давамлиқ тәһдит селишидин әнсирәйдиғанлиқини билдүргән гүәнтанамодики бир қисим уйғур мусапирлирини хатирҗәм қилиш үчүн ейтқан болуп, торибиоң уларниң һечнимидин ғәм қилмаслиқини тәкитлигән. Торибиоң бу сөзләрни австиралийә радиосиниң мухбири барбара хагинниң зияритини қобул қилғанда билдүргән болуп, у йәнә" улар хитайниң бу йәрдики тәсиридин әнсиргәндәк қилиду. Лекин бу бир мәсилә әмәс, бу орунсиз әнсирәш" дегән.

У хитайниң бу аралға айрупилан әвәтишидин көпирәк, уруш кемиси әвәтиш еһтимали барлиқидин әндишә қилидиғанлиқи, лекин хитай бундақ қилса, буниңға америкиниң бир немә дәйдиғанлиқини билдүргән. Нөвәттә палав гүәнтанамода қелип қалған 13 нәпәр уйғур мусапирни қобул қилишқа тәйяр икәнликини билдүрүватиду.

Лекин 13 нәпәр уйғур мусапирдин аз дегәндә 5 киши палавға беришни халимайдиғанлиқини, чүнки хитайниң тәһдитидин әндишә қилидиғанлиқини билдүргән иди.


Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.