Xitay, Uyghurlargha 'mukapatlash arqiliq az tughushqa köndürüsh' usulini qollanmaqta

Uyghur aptonom rayonluq pilanliq tughut komitétining mu'awin bashliqi yang mawlinning xitay axbaratlirigha éytqan sözliridin ashkarilinishiche, xitay da'iriliri 2008 - yilidin bashlap pilanliq tughut xizmitining nishanini asasliq Uyghur élining jenubidiki üch wilayet, bir oblastqa qaratqan bolup, bu rayonlardiki déhqan, charwichilarni siyaset buyiche üch perzentlik bolush hoquqidin waz kéchip, ikki yaki birla perzentlik bolushqa köndürüsh üchün pilanliq tughut mukapat meblighi ajratqan we mexsus étibar bérish siyasetlirini qollinip kelmekte iken.
Muxbirimiz gülchéhre
2009-02-03
Élxet
Pikir
Share
Print

Pilanliq tughut da'iriliri Uyghurlar zich olturaqlashqan üch wilayet, bir oblastta xitayning az sanliq millet déhqan, charwichilirigha qaratqan pilanliq tughut siyasitide belgilen'gen esli üch perzentlik bolushqa hoquqluq déhqan, charwichilar a'ilisi her bir perzentni az körüshke qoshulsa, üch ming yüendin mukapatlap, ularni az tughushqa righbetlendürüp bu rayondiki nopusning éshishini jiddiy kontrol qilmaqta iken.

Xitay da'iriliri Uyghur élide nopusning tebi'iy éshish nisbitini yenila pilandin yuqiri dep körsitip kelmekte. Buningda bolupmu, Uyghurlar nopusning %85 tin yuqirisini igileydighan üch wilayet, bir oblastni bekrek tilgha éliwatqan bolup, wang léchüen ötken yilidiki pilanliq tughut xizmet yighinida, da'irilerning Uyghur élining jenubidiki nopus kontrolluqini kücheytishini telep qilghan idi.

Radi'omizgha inkas qilghan Uyghurlar xitay hökümitining Uyghurlargha qarita nopus kontrolluqini rehimsiz rewishte mejburiy élip bériwatqanliqini shikayet qilghan bolsa,chet'ellerdiki Uyghur teshkilatliri xitay hökümitining Uyghurlargha qarita qattiq qolluq bilen yürgüzüwatqan pilanliq tughut siyasitining irqiy qirghinchiliqqa yatidighanliqini bildürmekte.


Toluq bet