Xitay da'iriliri hökümetni tenqid qilghan bir démokratiye pa'aliyetchisige 10 yilliq qamaq jazasi berdi
2011.03.25
Xitayning sichüen ölkisi suyning ottura xelq sot mehkimisi xitay démokratiye pa'aliyetchiliridin lyu shyenbinni kompartiye rehberlirige töhmet qilish bilen eyiblep, dölet hakimiyitini aghdurushqa qutratquluq qilish jinayitidin qamaq jazasigha höküm qilghan.
Mezkur sot xitay hökümitining ottura sherqtiki xelq isyanlirining xitaygha kéngiyishidin ensirep, démokratiye aktiplirini we kishilik hoquq adwokatlirini tutqun qilghan we nezerbend astigha alghan bir mezgilde élip bérilghan idi.
Lyu shyenbinning ayali chén mingshyenning birleshme agéntliqigha ashkarilishiche, jüme künki sot 3 sa'et dawamliship, lyu shyenbinning yuqiriqi jazagha mehkum qilin'ghanliqi élan qilin'ghan. Lékin bu, lyu shyenbinning siyasiy seweblerdin tunji qétim qamaq jazasigha höküm qilinishi emes. U burun bir qétim 10 yilliq qamaq jazasigha höküm qilin'ghan idi.
Jüme künki sotqa lyu shyenbinning akisining qatnishishigha ruxset qilin'ghan bolup, lyu shyenbin sotta teptish da'irilirining eyiblishini ret qilghan we özining gunahsiz ikenlikini bildürgen.
Kishilik hoquq teshkilatlirining ilgiri sürüshiche, suyning j x da'iriliri lyu shyenbinni 2009-yili 4-aydin 2010-yili 2-ayghiche chet'eldiki öktichi xitay tor betliride hökümetke qarshi maqale élan qilip, kompartiye rehberlirige haqaret qilghan we kompartiye hökümitige “Istibdat hakimiyet” dep töhmet chaplighan dégen seweblerdin qolgha alghan.
Xelq'ara kechürüm teshkilati jüme küni lyu shyenbinning qamaq jazasigha höküm qilinish munasiwiti bilen bayanat élan qilip, suyning ottura xelq sot mehkimisining qararini tenqid qildi we lyu shyenbinni derhal qoyup bérishke chaqirdi.
Xelq'ara kechürüm teshkilatining asiya-tinch okyan ishlirigha mes'ul mu'awin mes'uli ketirén beybér, bir parche maqale yazghanliq üchün 10 yilliq qamaq jazasigha höküm qilish kishini seskendüridu. Bu adaletni külkilik nersige aylandurup qoyghanliqtur dégen.