Qazaqistan iran'gha qoyuqlandurulghan uran satmaqchi bolghanliqini ret qildi

Charshenbe küni qazaqistan bilen iran, qazaqistanning iran'gha bir tonna 300 kilogram qoyuqlandurulghan uran satmaqchi bolghanliqigha da'ir metbu'at xewerlirining toghriliqini ret qildi. Analizchilar, eger qazaqistan iran'gha qoyuqlandurulghan uran satsa, bu b d t ning iran'gha qaratqan émbargo qararigha xilap ikenlikini bildürmekte.
Muxbirimiz erkin
2009.12.30

Qazaqistan tashqi ishlar ministirliki charshenbe küni bayanat élan qilip, iran'gha uranyum satmaqchi bolghanliqini ret qildi. Birleshme axbarat agéntliqi charshenbe küni tarqatqan bu heqtiki bir xewiride, qazaqistanning iran'gha 450 milyon dollar qimmitidiki qoyuqlandurulghan uran satmaqchi bolghanliqini, tereplerning kélishim tüzüshke az qalghanliqini bildürgen idi.

Iranning b d t diki wekili shu küni bayanat élan qilip, birleshme agéntliqning bu heqtiki xewirini inkar qildi. Amérika tashqi ishlar ministirliki bayanatchisi iyan kelliy seyshenbe küni qazaqistanni agahlandurup, b d t ning émbargo qararida her qandaq bir döletning iran'gha qoyuqlandurulghan uran sétishini chekleydighanliqini eskertken we her qaysi döletlerni b d t ning qararini ijra qilishqa ündigen idi.

Amérika iranning yadro qorallargha ige bolushigha hergiz köz yummaydighanliqini eskertip, iran yadro qurulushining meqsidi yadro qorallirigha ige bolush ikenlikini tekitlep kelgen. Lékin iran yadro qurulushining éléktir énérgiyisige érishish yolidiki tinch meqsetlerni chiqish qilidighanliqida ching turmaqta.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.