Qazaqistanda saylam pa'aliyetliri bashlinip ketti, emma közetküchiler buningdin ümidsiz

Qazaqistanning saylam pa'aliyetliri peyshenbe küni resmiy bashlandi. Qazaqistanda kéler ayning 3-küni élip bérilidighan prézidéntliq saylimida 4 namzat prézididéntliq musabiqisige chüshmekchi.
Muxbirimiz irade
2011.03.03

Fransiye agéntliqining xewer qilishiche, namzatlar hazirqi prézidént nursultan nazarbayéf, kommunist partiye bashliqi jambul exmetbékof, muhit teshkilati bashliqi mélis élusizof we parlamént ezasi ghani qasimof qatarliqlar iken.

Nursultan nazarbayéf muxbirlargha bergen bayanatida, saylamning adil we terepsiz élip bérilidighanliqini, saylam pa'aliyetliride özi üchün alahide bir teshwiqat élip barmaydighanliqini bildürgen. Emma közetküchiler bolsa, bu saylam netijisining alliqachan nazarbayéfning paydisigha chiqidighan qilip toghrilinip bolghanliqini ilgiri sürmekte.

Chünki, nazarbayéf yéqinda namzatlarning qazaqche imtihandin ötüshi kérekliki qanunini yolgha qoyup, özining küchlük reqiblirini shallap bolghan idi. Imtihandin ötken 11 namzatqimu 90 ming qollash imzasi shertini qoshup, netijide 4 la namzat qalghan idi.

Siyasiy analizchi dosim satpayéf fransiye agéntliqigha bu heqte bergen bayanida “Buninggha oxshash, héchqandaq bashqa bir tallash imkani bérilmigen we kimning yéngip chiqidighanliqi alliqachan békitilip bolghan saylam üchün teshwiqat pa'aliyetliri élip bérishning héchqandaq ehmiyiti yoq” dégen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.